Kiçik vergi pozuntuları azalmır

Bu ilin may ayında vergi orqanları tərəfindən keçirilmiş tədbirlər zamanı 5543 vergi ödəyicisində qanunvericiliyin pozulması faktları aşkar edilib. Aprellə müqayisədə pozuntu sayı 10,8% artıb.

Vergilər Nazirliyinin məlumatına görə, ötən ay 2500  vergi ödəyicisi tərəfindən nağd hesablaşmaların aparılması qaydalarını pozub. 3000 ticarət, iaşə və xidmət obyektində çek vurulmayıb. 1166 vergi ödəyicisi qanunla nəzərdə tutulmayan valyutanın ödəniş vasitəsi kimi qəbul edib. Hər bir belə fakta görə 400 manat cərimə nəzərdə tutulub. Təkrar olunanda məbləğ iki dəfə artır.

2012-ci ildən qeyri-leqal məşğulluqla mübarizə aparılsa da, iş yerlərinin açıqlanmaması aktualdır. Mayda 398  vergi ödəyicisi tərəfindən 576 nəfər fiziki şəxsin əmək müqaviləsi bağlamadan işə cəlb edildiyi aşkarlanıb. Apreldə 642 qeyri-leqal aşkarlanmışdı.

Vergilər Nazirliyi bu ildən vergi yığımını sabitləşdirmək üçün vergi ödəyiciləri ilə tərəfdaşlıq sazişi imzalayır. Amma kiçik biznes iqtisadi və vergi sisteminin onları qanunsuz işlərə məcbur etməsindən gileylidir. Bir çox hallarda yerli və xarici malların qaiməsi olmur. Demək, bu halda onlar dövlətdən ticari əməliyyatlara görə almalı olduqları ƏDV ala bilmirlər. Ona görə sahibkarlar məcburən dövriyyəni az göztərir. 08D