Lənkəranda səhmdar cəmiyyətlərində hesabatlılıq problemləri üzrə müşavirə keçirilib

Qiymətli Kağızlar üzrə Dövlət Komitəsi (QKDK) noyabrın 6-da Bakı ilə Lənkəran arasında səhmdar cəmiyyətlərində korporativ idarəetmənin və hesabatlıq sisteminin effektivliyinin artırılmasına dair 100-ə yaxın səhmdar cəmiyyətinin iştirakı ilə video-konfrans təşkil edib.

Heydər Əliyev Mərkəzində yığışanları QKDK-nın sədr müavini İlqar Muradov salamlayıb. O əminlik bildirib ki, bu konfrans Lənkəran, Lerik, Astara, Yardımlı, Cəlilabad, Biləsuvar rayonlarında fəaliyyət göstərən səhmdar cəmiyyətlərində korporativ idarəetmənin tətbiqinin, maliyyə hesabatlıq sisteminin qanunvericiliyin tələblərinə uyğun şəkildə qurulmasında və səhmdarların hüquqlarının effektiv qorunmasının təmin edilməsində mühüm əhəmiyyət kəsb edəcək. 

QKDK-nın Aparatının rəhbəri Bəxtiyar Əzizov Lənkəran şəhər Mərkəzi kitabxanasının və Lənkəran Dövlət Universitetinin nümayəndələrinə komitə tərəfindən nəşr edilmiş kitabları hədiyyə edərək, “bu nəşrlərin regionda ictimaiyyətin və tələbələrin qiymətli kağızlar bazarı haqqında biliklərinin artırılmasında mühüm əhəmiyyəti olacağını” vurğulayıb.

Video-konfrans iştirakçıları səhmdar cəmiyyətlərin hesabatlığına dair milli qanunvericilik tələbləri, beynəlxalq təşkilatlarla birgə hazırlanan yeni qanunvericilik təşəbbüsləri barədə məlumatlandırılıb. QKDK təmsilçiləri tədbir iştirakçılarını maraqlandıran sualları cavablandırıblar.

Qanunvericiliyə əsasən, səhmdar cəmiyyətləri korporativ idarəetmənin minima tələblərinə əməl etməli, illik və maliyyə hesabatları nəşr etməlidirlər. 2011-ci ildə 1500 SC-dən 464-ü illik hesabat verib. Hesabat vermədiyi üçün və başqa nöqsanlara görə 350 SC cərimələnib. Bankların və sığorta şirkətlərin bir hissəsi, qeyri-maliyyə SC-lərin cüzi hissəsi illik və maliyyə hesabatlarını nəşr edirlər. Bu işə nəzarət funksiyası Maliyyə Nazirliyinin səlahiyyətindədir. 08D