QHT-lərin iqtisadi fəaliyyəti məsələləri müzakirə olunub

Çərşənbə axşamı İqtisadi Araşdırmalar Mərkəzi (İAM) və Soros Fondu yanında Marşal Fondunun təşkil etdiyi “dəyirmi masa”da “QHT-lərin iqtisadi fəaliyyəti və vergi ödənişləri” mövzusu müzakirə olunub.

İştirakçılar iqtisadi fəaliyyət zamanı- biznes qurumlardan xeyriyyə ianələrinin, həmçinin qrantların alınmasında  QHT-lərə vergi güzəştlərinin tətbiqini müzakirə ediblər.

İAM rəhbəri Qubad İbadoğlu Avropa ölkələri və Türkiyənin təcrübəsindən bəhrələnməyin mümkünlüyünü qeyd edib. Belə ki, bu ölkələrdə QHT-lərə maliyyə dəstəyinin təşviqedici mexanizmləri tətbiq olunur.

Marşal Fondunun rəhbəri Mehriban Rəhimli də QHT-lər üçün donorluq məsələsində Türkiyənin təcrübəsindən istifadə olunmasının mümkünlüyünü qeyd edib.

Auditor Altay Cəfərov “İqtisadi fəaliyyət və vergi ödənişləri” mövzusunda təqdimatla çıxış edib. 

Müzakirələr zamanı qeyd olunub ki, Azərbaycanda QHT-lər üçün müəyyən güzəştlərin olmasına baxmayaraq, ümumilikdə qanunvericilik QHT-lərin fəaliyyəti və cəmiyyətin problemlərinin həllində onların iştirakının genişləndirilməsi üçün imtiyazlı mühiti təmin etmir. 

Bəzi bəndlərə görə, fəaliyyət şəraiti hətta pisləşib. Əsasən QHT-lərdən maliyyə fəaliyyətinə dair müntəzəm hesabatlar tələb olunmağa başlayıb, qanunvericiliyin pozulmasına görə cərimələr artırılıb.

Görüş zamanı mövcud problemlərin həlli yollarına dair konkret tövsiyələr irəli sürülüb.-06B-