Mənzil sığortası ləng gedir

Şəxsi evlərin icbari sığortası üzrə müqavilə bağlanması prosesi ləng gedir. 

YAP-ın saytına müsahibəsində «Azərsığorta» şirkətinin İH sədri Məmməd Məmmədov bildirib ki, 7 ayda 30 min 250 müqavilə bağlanılıb və 1 mln 153 min manat mükafat əldə edilib. 

Yığılan məbləğə görə fikir yürütsək (paytaxtda birdəfəlik sığorta haqqı 40, əyalətlərdə 30 manatdır), müqavilələrin çoxu paytaxtda bağlanılıb. Yevlaxda 1245, Şirvanda 800, Gədəbəydə 964, Yardımlıda 919, Ağstafada 786, Qazaxda  647 müqavilə bağlanılıb. Qalan rayonlarda irəliləyiş yoxdur. Səbəb isə təbliğatın zəif olmasıdır. Bu, yeganə şirkətdir ki, 80 rayon mərkəzi və şəhərdə ofisləri var. 

İcbari Sığorta Bürosunun üzvü olan 12 şirkət bu növ üzrə yanvar-iyulda 5 mln 527,78 min manat, avtonəqliyyat vasitələri sahiblərinin mülki məsuliyyətinin icbari sığortası üzrə 41 mln 95,05 min manat mükafat yığıblar. 

Müqavilələrin 29 mini yaşayış evləri və mənzillər (1 mln 21 min), 1 min 260-ı qeyri-yaşayış obyektləri (131,41 min manat) üzrə bağlanılıb. 

Şirkətin 112 hadosə üzrə ödənişləri 295,7 min manat olub. Bunun 149 min 854 manatı Zaqatala, Balakən və Qaxda zəlzələdən ziyan çəkən 93 əmlak shibinə verilib. 

İH sədrinin sözlərinə görə, şirkətin sığorta bazarında xüsusi çəkisi 9%-dir. 

«AzərSığorta» 1991-ci ildən fəaliyyət göstərir. Şirkət 28 könüllü və 10 icbari növ üzrə xidmət göstərir. 2009-2011-ci illərdə «AzərSığorta» Azərbaycanda sığorta mükafatı və ödənişləri üzrə lider olub. 28 mart 2012-ci ildə üç icbari növ üzrə lisenziya alıb. --17D—