Minoritarlar Rusiya biznesmenini hüquqlarını pozmaqda ittiham edirlər

Bu gün bir qrup “AzNar” QSC minoritarı mətbuat konfransı keçirərək 99,95% səhm sahibi, Azərbaycan mənşəli Rusiya sahibkarı Fərhad Əhmədovu səhmdarların hüquqlarını pozmaqda ittiham ediblər. F.Əhmədovun son qərarı ilə “AzNar”ın 30 minoritarı SC-dən kənarlaşdırılıb. Düzdür, bu, dövlət strukturlarında qeydiyyatı tələb edir. 

Səhmdar Şahin Əlizadə deyib ki, minoritarların bəlası 2005-ci ildən başlayıb. O vaxt  Fərhad Əhmədov atasının sovet vaxtı direktoru olduğu Göyçay konserv zavoduna nəzarətə başlayıb. Rusiyalı milyarder əvvəlcə “Göyçay Konserv”in adını “AzNar” ASC qoyub. Sonra səhmdarların sayı 50-ə azalıb, SC bağlanılıb. Fərhad Əhmədovun təşəbbüsü ilə SC-nin nizamnamə kapitalı iki dəfə artırılıb. Nəticədə kiçik paket sahiblərinin xüsusi çəkisi 0,05%-ə düşüb. Səhmdarlar dəfələrlə QKDK-yə müraciət ediblər. Sonradan məlum olub ki, «tərəflər ümumi dil tapıb», səhmdarların hüququ isə bərpa olunmayıb. İndi o, minoritarlardan tam qurtulmaq istəyir. 

Səhmdar Vəzir Rəcəbov qeyd edib ki, onları İsmayıllı rayonuna göndərməyə hazırlaşırlar. Əhmədov orada “AzNarŞərab” ASC təsis etmək istəyir. Özü orada nəzarət paketinə (51%) sahib olacaq. Səhmdar hesab edir ki, “AzNar” QSC-nin əmlakının bölünməsi qanunvericiliyə ziddir. 

Mətbuat konfransındac aydın olub ki,  “AzNar” QSC-də ciddi maliyyə pozuntuları var. Bu isə çoxmilyonlu ziyan gətirir. Səhmdarlar Şəmsədin Allahverdiyev və Bəşir Bayramov deyib ki, “AzNar” və “Grante” brendli təbii nar şirələrinin buraxılış qiyməti 3-3,60 manatdır. Onların butulkasını  Rusiyada $11-a satırlar. Rusiyada şirələri Fərhad Əhmədova məxsus “Grante” MMC satır. Yəni Göyçay konserv zavodu ciddi itkilərlə üzləşir, ziyanı isə dividend almayan minoritarlar çəkir. 08C