Moody’s ABB-nin reytinqinə yenidən baxıb

Bu gün «Moody's» beynəlxalq reytinq agentliyi «Azərbaycan Beynəlxalq Bankı» ASC-nin (ABB) reytinqlərinə yenidən baxıb və bir sıra göstəriciləri aşağı salıb.

İnformasiyaya əsasən, bankın xarici valyutada uzunmüddətli və qısamüddətli depozit reytinqi «Ba3» bəndindən «B1» bəndinə endirilib. Bununla yanaşı, bankın prioritet təmin olunmamış borcu üzrə reytinqi «Ba3»dən «B1» bəndinə, uzunmüddətli xarici öhdəlikləri üzrə reytinqi isə «B1»dən «B2»yə salınıb.

Qısamüddətli depozit reytinqi və risk qiymətləndirməsi «Not-Prime» səviyyəsində təsdiqlənib. Bankın uzunmüddətli və təmin olunmamış depozit reytinqləri üzrə proqnozu neqativdir.

Moody's-in hesabatında qeyd edilir ki, reytinqlərin endirilməsi bankın maliyyə dayanıqlılığının pozulması ilə bağlıdır. Yaxın zamanda baş tutan 600 milyon manatlıq kapitalizasiyaya baxmayaraq, bankın kapital mövqeyi neqativdir. Buna isə əvvəllər yığılmış zərər səbəb olub, - deyə agentliyin açıqlamasında bildirilir.

Agentliyin hesablamalarına görə, 2016-cı ilin sonuna bankın xarici öhdəliklərinin həcmi 4 milyard manat və ya 2.1 milyard dollardır. Bununla yanaşı, bankın xarici valyutada məhdud likvidliyi var. 08D