Müsadirə olunmuş malların gömrük satışının qaydaları təsdiqlənib

Oktyabrın 19-da  Nazirlər Kabineti dövlət mülkiyyətinə keçirilmiş malların və nəqliyyat vasitələrinin gömrük hərraclarında satılması qaydalarını təsdiqləyib. Hərracın təşkilatçısı və satıcısı qismində Dövlət Gömrük Komitəsinin  tabeliyində olan “Azərterminalkompleks” çıxış edir.

Hərraca çıxarılan malların ilkin dəyəri bazar qiyməti əsasında tənzimlənir. Hərrac iştirakçılarından ilkin dəyərin 0,5% həcmi tutulur. Hərraclarda DGK ilə hər hansı əlaqəsi olan şəxslərin iştirakı qadağan edilir.

Hərrac komissiyası beş nəfərdən, o cümlədən Maliyyə Nazirliyinin nümayəndələrindən ibarətdir. Hərrac barədə onun keçirildiyi vaxtdan 30 gün əvvəl DGK-nın saytında məlumat verilir. Hərraclarda iştirak hüququ qazanan iddiaçılara hərraca çıxarılan mallarla tanışlıq imkanları verilir. Hərracda əldə olunan malın tam dəyəri beş gün ərzində ödənilir.

Əgər hərraclara ərizələr təqdim olunmayıbsa ilkin dəyər mərhələli şəkildə 10%, 25% və 50% azalır. Malın başlanğıc dəyərinin yarıyadək azaldığı halda (qiymətli məmulatlar və qiymətli daşlar istisna olmaqla) əmlak təkrar qiymətləndirməyə şamil edilir.

Əmlakın satışından əldə olunan vəsait DGK-nın büdcədənkənar inkişaf fonduna köçürülür. Şəxsin dövlətin xeyrinə imtina etdiyi əmlakın satışından əldə olunan vəsait dövlət büdcəsinə köçürülür.  08B