Nazirlər Kabineti Qəbələ rayonunda avtoyollar üzrə vəsaitin rotasiyasını keçirib

Nəqliyyat Nazirliyinin iki avtoyol layihəsi 12,7 mln manat bahalanıb. Nazirlər Kabineti yerli İcra Hakimiyyətinin bu rayonda başqa layihəsində maliyyəni azaldıb. 

Nazirlər Kabinetinin informasiya resursunda verilən məlumata görə, Qəbələ-Ağdaş yolunun yenidən qurulması (22 km) layihəsi çərçivəsində yolun abadlaşdırılması, kommunikasiyaların köçürülməsi, işıqlandırma işləri üçün ayrılması nəzərdə tutulmuş vəsait 12 mln 700 min manat azaldılıb. 2011-ci ildə dövlət büdcəsindən bu məqsədlə 35 mln manat ayrılıb. Bu il həmin layihəyə əlavə 20 mln manat ayrılıb. Bu layihədən kəsilən məbləğ avtoyol üzrə tikinti (7,7 mln manat) və Qəbələ-Küsnət-Laza avtomobil yolunun yenidən qurulması layihəsi üzrə yaşayış və qeyri-yaşayış obyektlərinin və müxtəlif növ kommunikasiya xətlərinin köçürülməsi üçün xərclənəcək (5 mln manat). 

Qeyd edək ki, Qəbələ-Ağdaş yolunun tikintisinə hökumət 2011-ci ildə 50 mln manat ayırıb. Beləliklə, Nəqliyyat Nazirliyi əlavə vəsait tələb etməsə, bu yolun 1 km-i büdcəyə 4 mln 545 min manata başa gələcək.  

2012-ci ildə Qəbələ-Küsnət-Laza avtomobil yolunun yenidən qurulmasına 10 mln manat ayrılıb. 

Rəqəmlərdən göründüyü kimi, hökumət regionlarda avtoyol tikintisini maliyyələşdirəndə xəsislik etmir. Bu vəsaitlərdən necə istifadə edilməsi və keyfiyyıət başqa məsələdir. Bir qayda olaraq, Nəqliyyat Nazirliyi çat və çüxurları yamamaq üçün layihələrə “yenidən qayıdır”. Ona görə ekspertlər avtoyol layihələrindəki korrupsiyanı ilk cərgələrə qoyur. Hərçənd Hesablama Palatası bu layihələrdə vəsaitlərdən düzgün istifadə edilməməsi üzrə fakt «tapa bilmir».  08B