Qaburiç Azercell Telecom-dan getdi

“Azercell Telekom”un prezidenti vəzifəsini icra edən Kiril Qaburiç müqavilə müddəti başa çatdığına görə şirkəti tərk edəcəyini açıqlayıb. Eyni zamanda o, “Azercell”in daxil olduğu TeliaSonera Qrupundan kənarda digər karyera imkanlarını nəzərdən keçirməyi qərara aldığını söyləyib. O, 14 ilə yaxın bir zaman ərzində Qrup daxilində çalışmış, Azercell-ə qoşulmazdan əvvəl Moldcell şirkətinin prezidenti kimi fəaliyyət göstərmişdir.

TeliaSonera şirkətlər qrupunun vitse-prezidenti və Avrasiya regionunun prezidenti Erik Hallberg ona il ərzində sərf etdiyi bağlılıq, zaman və səylərinə görə təşəkkürümü bildirib.

“Azercell Telekom”un təsisçisi şirkətə yeni prezident təyin edənə qədər şirkətin prezidenti vəzifəsini Vahid Mürsəliyev icra edəcək. O, yeni vəzifəsinin icrasına 2015-ci il yanvarın 5-dən başlayacaq.

 «Vahid Mürsəliyevi icra edəcəyi yeni vəzifəsi ilə təbrik edirəm. Sadiq idarəetmə komandası ilə birgə ötən 6 ay ərzində müşahidə etdiyimiz müsbət dönüşü davam etdirəcəyimizə səmimi şəkildə inanıram”, deyə Erik Hallberg əlavə edib.

Vahid Mürsəliyev 2005-ci ildə Azercell-ə qoşulub. O zamandan Vahid Mürsəliyev şirkət prezidentinin baş müşaviri və Hüquq və İdarə İşləri Departamentinin direktoru da daxil olmaqla, müxtəlif rəhbər vəzifələri icra edib.

2000-2001-ci illərdə Vahid Mürsəliyev ABŞ-ın Case Western Reserve Universitetinin Korporativ İdarəetmə üzrə doktorluq dərəcəsini əldə edib. O, Beynəlxalq Hüquqşünaslar Assosiasiyasının üzvü və Beynəlxalq Ekoenergetika Akademiyasının doktorudur. O, həmçinin, Bakı Dövlət Universitetinin Hüquq fakültəsinin məzunudur.

Teliasonera Kiril Qaburiçdən sonra Azercell-in prezidenti vəzifəsini icra edəcək namizədin axtarışını həyata keçirməyə başlayır. --17D—