Qiymətli kağızlar bazarının inkişafı üzrə Dövlət Proqramının icrası müzakirə edilib

26 dekabr 2012-ci il tarixində Azərbaycan Respublikasının Qiymətli Kağızlar üzrə Dövlət Komitəsinin (QKDK) Əlaqələndirmə Qrupunun növbəti iclasında “2011-2020-ci illərdə Azərbaycan Respublikasında qiymətli kağızlar bazarının inkişafı” Dövlət Proqramının icra vəziyyəti müzakirə edilib. 

İclasda 2012-ci ildə həyata keçirilmiş tədbirlər, habelə 2013-cü il ərzində nəzərdə tutulmuş tədbirlərin icra mexanizmləri müzakirə edilib. 

İclası giriş sözü ilə açan QKDK-nın sədr müavini, Əlaqələndirmə Qrupunun rəhbəri İlqar Muradov Dövlət Proqramının qiymətli kağızlar bazarının keyfiyyətcə yeni səviyyəyə qaldırılması və effektiv kapital bazarının formalaşmasını hədəflədiyini bildirib. Onun sözlərinə görə, bu dövrdə infrastrukturun müasirləşdirilməsi, qanunvericiliyin təkmilləşdirilməsi, əlverişli işgüzar mühitin formalaşdırılması ilə yanaşı, bütövlükdə qiymətli kağızlar bazarında peşəkar hazırlığın və məlumatlılığın artırılması istiqamətlərində uğurlu layihələr həyata keçirilib. 

İclasda Maliyyə, Vergilər, İqtisadi İnkişaf, Təhsil Nazirlikləri, Mərkəzi Bank və Əmlak Məsələləri Dövlət Komitəsinin nümayəndələri iştirak edib. 

Qeyd edək ki, ötən dövrdə bazarın peşəkar iştirakçıları arasında iş avtomatlaşdırılıb, bir sıra normativ aktlar qəbul edilib. Amma ölkədə bir dənə də investisiya fondu yoxdur, fond bazarında əməliyyatlar yarımşəffafdır, kapital bazarının iştirakçıları maliyyə institutlarıdır, deyə ekspertlər qeyd edir. QKDK-nın iştirakı ilə hazırlanan 4 qanun layihəsi (Mülki Məcəlləyə əlavə və dəyişikliklər üzrə iki, İnzibati Xətalar Məcəlləsinə əlavə və dəyişikliklər və «Qiymətli kağızlar bazarı haqqında» qanun layihəsi) indiyəcən parlamentə təqdim edilməyib. 08D