Regional inkişafın ümumi rəqəmləri

Heydər Əliyev Mərkəzində “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunan konfrans keçirilib. Tədbirdə iqtisadiyyat və sənaye naziri Şahin Mustafayev də çıxış edib və bildirib ki, regionlara 4,5 mlrd manat investisiya qoyulub. 

O deyib ki, bu dövrdə bölgələrdə müxtəlif təyinatlı infrastruktur obyektlərinə 270 milyon manat vəsaitin ayrılması barədə imzalanana 72 sərəncam regionların inkişafına diqqətin bariz nümunəsidir. Amma nazir işlərin səmərəsi barədə danışmayıb.

İl ərzində 960 kilometr ölkə və yerli əhəmiyyətli avtomobil yolu, 30 yeni körpü və yolötürücüləri tikilmiş və ya təmir olunub. 43 sərəncamla bu məqsədlərə əlavə vəsait ayrılıb, əhalisi 960 min nəfər olan 597 yaşayış məntəqəsini birləşdirən 1300 kilometr uzunluğunda kənd yollarının çəkilməsi və yenidən qurulması işləri aparılıb. Ötən il 5 elektrik stansiyası istifadəyə verilib, regionlarda 3 min kilometr elektrik xətləri, 614 transformator, 20 yarımstansiya, 1450 kilometr qaz kəməri inşa edilmiş və ya əsaslı təmir olunub, 24 rayon üzrə 58 yaşayış məntəqəsi təbii qazla təmin edilib.

Nazir deyib ki, ötən il regionlarda 4,4 min müəssisə fəaliyyətə başlayıb, regionlardan dövlət büdcəsinə mədaxil 9,8% artıb. --17D—