Rezin və plastmas məmulatlar üzrə elastik statistika

Bu ilin 9 ayında Azərbaycanda 31,5 mln manatlıq rezin və plastmas məmulatlar istehsal edilib. Bu, ötən ilin eyni dövründəkindən 35,4% azdır, deyə Dövlətstatkom bildirir. Təəccüblüdür ki, plastmass məhsul ixracı istehsal həcmindən 2,8 dəfə çoxdur.

Polimer sənayesində əsas məhsul boru və birləşdirici hissələrdir. İlin əvvəlindən bu məhsuldan 12 684 ton istehsal olunub. Bu, ötən ilin eyni dövründəkindən 42% azdır. Son illər ölkədə polietilen və başqa borular istehsal edilən bir neçə müəssisə yaranıb. Onların çoxu Abşeronda yerləşir.

Gömrük Komitəsinin məlumatına görə, bu ilin 9 ayında $114,1 mln-luq. (89 mln manat) plastmas məmulatlar ixrac edilib. Yerli şirkətlərin yerli bazarın tələbatını ödəyib, ixracı necə artırdığı müəmmalıdır. Bunu gizli iqtisadiyyat və korrupsiya mütəxəssisləri izah edə bilər. Müəssisələr istehsal göstəricilərini vergi və statistikadan gizlədir, gömrükdən gizlətməyi “unudur”.

Dövlətstatkoma görə, ölkədə rezin və plastmas məmulatlar istehsal edən 89 müəssisə var. Bunun 20-i orta biznesə aiddir.

2013-cü ildə rezin və plastmas məmulatlar istehsalı 74 mln manat təşkil edib. Bu, 2012-ci ildəkindən 3,3% çoxdur. Özəl sektor 88.6% paya malikdir. 2005-ci illə müqayisədə məhsul istehsalı 47% artıb. 25 690 ton plastmass boru və birləşdirici hissələr istehsal olunub. Ötən il azərbaycanda bu məhsulların qiymət indeksi 5,9% azalıb. 

2011-2013-cü illərdə bu sahəyə 113,4 mln manat investisiya qoyulub. Bunun 50,3 mln manatı 2013-cü ilin payına düşür. Əsas fondların qiyməti 141.2 mln manat olub.

2013-cü ildə rezin və plastmas məmulatlar istehsalında işçi sayı 600 nəfər artaraq 4.4 min nəfərə çatıb. Maya dəyərində əmək haqqının payı 2013-cü ildə 13.5%, material xərcləri 69% olub. Sektorda orta maaş 378 manatdır (2012-ci illə müqayisədə +30%). 08B