Rüsumsuz gətirilməsi icazə olan əmtəələrin həcminin maksimum həddi 6 dəfə artırılır

Azərbaycan Prezidenti İlham Əliyev gömrük sahəsində nəzarətin həyata keçirilməsi ilə əlaqədar bəzi yoxlamaların sadələşdirilməsi haqqında fərman imzalayıb.

Dövlət başçısı gömrük-buraxılış məntəqələrində gömrük-keçid qaydalarının sadələşdirilməsi məqsədilə qərara alıb:

- Fiziki şəxslər tərəfindən Azərbaycan Respublikasının gömrük ərazisinə gətirilən və istehsal, yaxud kommersiya məqsədləri üçün nəzərdə tutulmayan ümumi gömrük dəyəri 10000 ABŞ dolları ekvivalenti məbləğindən (müşayiət edilən hər bir yetkinlik yaşına çatmamış fiziki şəxsə görə əlavə 2000 ABŞ dolları ekvivalenti məbləğindən) artıq olmayan mallar gömrük ödənişi ödənilmədən gömrük sərhədindən keçirilir.

Bu  qayda aksizli mallar, avtonəqliyyat vasitələri və səfər zamanı fiziki şəxsin zəruri ehtiyaclarının ödənilməsi üçün nəzərdə tutulan əşyalara aid edilməyəcək.

Dövlət Gömrük Komitəsinə tapşırılır ki, “Azərbaycan Respublikasının İnzibati Xətalar Məcəlləsində dəyişiklik edilməsi haqqında” Azərbaycan Respublikası Qanununun tətbiq edilməsi barədə” Azərbaycan Prezidentinin 2011-ci il 3 mart tarixli 396 nömrəli fərmanının 3.1-ci və 3.2-ci bəndlərinə uyğun olaraq, gətirilməsi və aparılması qadağan edilən və məhdudlaşdırılan əşyaların siyahısının dövlət sərhədinin buraxılış məntəqələrində hər kəsin yaxşı görə biləcəyi lövhələrdə yerləşdirildiyinə dair məlumatı bir ay müddətində Azərbaycan Prezidentinə təqdim etsin.

Azərbaycan Respublikası Vergi Məcəlləsinin 190-cı maddəsinə görə, yeyinti spirti, pivə və spirtli içkilərin bütün növləri, tütün məmulatları, neft məhsulları, minik avtomobilləri (xüsusi işarə və avadanlıqla təchiz edilmiş xüsusi təyinatlı avtonəqliyyat vasitələri istisna olmaqla), istirahət və ya idman yaxtaları, həmçinin bu məqsədlə nəzərdə tutulan digər üzən vasitələr aksiz mallarına şamil edilir.  02D-