Sığorta agentləri vaxtaşırı AVSMMİS müştərilərini çaşdırır

Dövlət Sığorta Nəzarəti Xidməti bundan sonra da avtonəqliyyat vasitələri sahiblərinin mülki məsuliyyətinin icbari sığortası (yeni AVSMMİS) üzrə hədiyyə və başqa stimulyatorlar hesabına müştəri cəlb edilməsinin qarşısını alacaq. 

Sığorta Agentlərinin I Milli Forumunda xidmətin lisenziya, ərizə və şikayət şöbəsinin rəisi Mahir Abdullayev bildirib ki, İcbari Sığorta Bürosunun ayrı-ayrı iştirakçılarına xəbərdarlığa baxmayaraq, poliisin qanunvericiliyə zidd satışı halları var. 

Yeni tariflə AVSMMİS polisi satışına 16 dekabr 2011-ci ildən başlanılıb. Abdullayevin sözlərinə görə, qaydalar qüvvəyə minəndən sığortaçılar hədiyyə kampaniyalarına başlayıb, yanğınsöndürən, tibb apteki, tarif güzəştləri və s. təklif edirlər. Bu isə qanunvericiliyin pozulmasıdır. 

Məmurun sözlərinə görə, regionlarda AVSMMİS polisi satılan zaman hədiyyə kampaniyaları yenidən başlayıb və bunun qarşısı qanun yolu ilə alınacaq. Hazırda Azərbaycanda sığorta agenti lisenziyasına 46 hüquqi və 597 fiziki şəxs malikdir. 

Şöbənin məsləhətçisi Firdovsi Ağaşirinov bildirib ki, sığorta agentlərinin fəaliyyətindən şikayətlər onların səriştəsizliyi və müştəri ilə ünsiyyət zamanı etikanın pozulması ilə bağlıdır. Sığorta agentləri çox vaxt müştərilərə sığorta müqaviləsinin mahiyyətini başa salmır, sənədin şərtləri ilə onları tanış etmirlər. Bəziləri öz üzərində işləmir, qanunvericilikdə və normativ aktlardakı son dəyişikliklərdən xəbərləri olmur. --17D—