SKMF Xızı sahibkarlarına kredit ayıracaq

Sahibkarlığa Kömək Milli Fondu Xızı rayonunda prioritet kreditləşmə sahələrini müəyyən edib.

Rayonda sahibkarlıq subyektlərindən aşağıdakı istiqamətlərdə investisiya layihələrinin maliyyələşdirilməsi üçün təkliflərin qəbulu məqsədəuyğun hesab edilib: kiçik cins heyvandarlıq təsərrüfatlarının yaradılması; arıçılıq təsərrüfatlarının (o cümlədən sənaye üsulu ilə bal istehsalı) yaradılması; kiçik pendir istehsalı və plastik qapı-pəncərə istehsalı müəssisələrinin yaradılması.

"Sahibkarlar bu sahələr üzrə nümunəvi layihələri Sahibkarlığa Kömək Milli Fondundan əldə edə bilərlər. Sahibkarların istəyinə əsasən, bu investisiya layihələrinin dəyərinin 100%-dək hissəsi dövlətin güzəştli kreditləri hesabına maliyyələşdiriləcək. Bu gündən etibarən sahibkarlar investisiya layihələrinin maliyyələşdirilməsi məqsədilə müvəkkil kredit təşkilatları vasitəsilə Fonda müraciət edə bilərlər, deyə məlumatda bildirilir.

SKMF 1992-ci ildə yaradılıb. 2002-ci ildən fəal şəkildə kredit verməyə başlayıb. Kreditlər 46 müvəkkil bank və qeyri-bank kredit təşkilatı vasitəsilə verilir. 2013-ci ildə Fond 4500 layihəyə 275 mln manat güzəştli kreditlər verib. 2014-cü ildə SKMF xətti ilə sahibkarlığın güzəştli kreditləşməsinin həcmi 280 mln manata çatacaq. Son illər saxta sahibkarlıq təsərrüfatları vasitəsilə müvəkkil bankların milyonlarla vəsaiti mənimsəməsi barədə qalmaqallar yaranıb. --17D—