Strateji yol xəritəsi Prezident Aparatında qəsdən gecikdirilir – ekspert

Milli iqtisadiyyat və iqtisadiyyatın əsas sektorları üzrə Strateji yol xəritəsinin hazırlanmasına ayrılan vaxt çoxdan keçib, amma sənəd haqda heç bir məlumat yoxdur.

Turan-ın məlumatına görə, iqtisadçı Qubad İbadoğlu «Facebook» səhifəsində belə yazıb.

Ekspert xatırladır ki, prezident İlham Əliyev 16 mart 2016-cı ildə "Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri”nin təsdiqi və bundan irəli gələn məsələlər haqqında sərəncam imzalayıb.

Prezidentin iqtisadi islahatlar üzrə köməkçisi Natiq Əmirovun sədrliyi ilə işçi qrup 2016-2020-ci illər üçün iqtisadi inkişaf strategiyasının və tədbirlər planının, 2025-ci ilədək dövr üçün uzunmüddətli baxışın, 2025-ci ildən sonrakı dövrə hədəf baxışının layihəsini 6 ay müddətində prezidentə təqdim etməli idi.

Yol xəritəsi 8 əsas sektora bölünüb: neft-kimya, aqrar-sənaye, istehlak malları, ağır sənaye və maşınqayırma, turizm, logistika, əlçatan mənzil və peşə hazırlığı.

İnfrastruktura sonradan tam özəlləşdirilməklə İKT, maliyyə və kommunal xidmət də daxildir.

İqtisadçı qeyd edib ki, həmin sənədlərin layihələrinin vaxtında Prezident Aparatına təqdim olunduğuna şühbəsi yoxdur, onun məqsədli şəkildə gecikdilriləcyi ilə bağlı gözləntiləri isə artıq özünü doğrultmaqdadır.

«Bu istiqamətdə görülən işlərə külli miqdarda ödəniş hesabına dünya şöhrətli McKinsey şirkəti də cəlb olunub, amma əvvəlcədən də gözləndiyi kimi, onu Aparatdan keçirmək o qədər də asan olmayacaq. Şübhə etmirəm ki, Aparatda ilişib qalan sənədlərin "hərəkətini orda tormozlayan qüvvələrə" yaxın zamanlarda qalib gəlmək mümkün olsun. Yəqin ki, "bu xəmir hələ çox su aparacaq" Bundan da ən çox itirən iqtisadiyyat, biznes və biz istehlakçılar olacaq”, deyə İbadoğlu yazır.

İqtisadi İslahatların Təhlili və Kommunikasiya Mərkəzi Qubad İbadoğlunun bəyanatın reaksiya verib və sənədin ilin sonuna qədər təsdiqi və ictimaiyyətə açıqlanmasının planlaşdırıldığını bildirib.

Mərkəzin icraçı direktoru Vüsal Qasımlının sözlərinə görə, hazırda sənədin hüquqi və linqvistik ekspertizası həyata keçirilir.

«Eyni zamanda Strateji yol xəritəsinin gələcək 10 ildən artıq bir müddətdə vacib əhəmiyyəti əsas götürülərək bütün dövlət orqanlarından müvafiq rəylərin alınması prosesi gedir», deyə Qasımlı bildirib. 71D