Sumqayıt İH-də əmək haqqı barədə yüksək fikirlər

 Bu günlərdə Sumqayıt şəhər İcra Hakimiyyətində I yarımilin yekunlarına həsr edilmiş iclasda zalda oturanları heyrətləndirən rəqəmlər açıqlanıb. Arzunu gerçəklik kimi təqdim edən şəhər rəhbərliyi bildirib ki, şəhərdə orta aylıq maaş ölkə üzrə göstəricidən 15% çoxdur. 

Sumqayıt İH başçısının müavini Sahib Quliyev iclasda bildirib ki, şəhərdə orta aylıq maaş 470 manatdır və ötən ilin eyni dövrü ilə müqayisədə 23,7% artıb. Sumqayıt İH Statistika İdarəsində Turan-a bildiriblər ki, onlarda şəhər üzrə orta aylıq maaş barədə məlumat yoxdur. I rübdə Sumqayıtda orta aylıq maaş 329,5 manat olub. Demək, Sumqayıt İH-də maaşlara qısa müddətə 43% “artım” edilib.

Bu hələ hamısı deyil. İclasda deyilib ki, Sumqayıt Texnoloji Parkında (STP) 4000-dən çox adam işləyir. Onların orta aylıq əmək haqqı 600 manatdır. “Gilan Tekstil Park”da (GTP) 600 nəfər çalışır. Orda maaş 500 manatdır. Turan-ın əldə etdiyi informasiyaya görə, STP-də orta personal 380 manat, GTP-də 250 manat alır. 

Dövlətstatkomda Turan-a bildiriblər ki, qanunvericiliyə əsasən, təsərrüfat subyektlərinin statistik məlumatları məxfidir və yəqin, işçilərin əmək haqqı barədə məlumatlar Sumqayıt İH-ə müəssisələrdən daxil olub. Beləliklə, maaş barədə şişirdilmiş informasiya verməklə bir sıra müəssisələr əhalinin rifahı barədə yanlış mənzərə yaratmağa çalışırlar. 

DSK-nın məlumatına görə, bu ilin I yarısında Azərbaycanda orta aylıq maaş 408 manat olub. Burda hasilat sənayesinin “xidməti” var. Orda işçilər 1100 manat maaş alır. İqtisadiyyatın başqa sektorlarında əmək haqqı daha azdır. 08B