Telman İsmayılov kreditorları dəf edə bilrmir

Moskvanın Arbitraj Məhkəməsi Moskva Bankının Telman İsmayılovun AST şirkətinə məxsus 213 mln. dollar dəyərində əmlaka həbs qoyulması haqqında vəsatətini təmin etməyib.

İddiaya səbəb bankın əslən azərbaycanlı olan oliqarxdan 197.3 mln. dollar ölçüsündə borcu almaq cəhdidir, xəbəri RBK yayıb.

“Kommersant” qəzetinin məlumatına görə, biznesmen Rusiyanın paytaxtında öz daşınmaz əmlakını satmaqla (bəzi məlumatlara görə, bu, “Praqa” restoranı idi) problemli kreditin ödənilməsi məsələsini məhkəmədənkənar qaydada həll etməyə çalışıb. Amma sövdələşmə pozulub və iyulun sonlarında Moskva Bankı məhkəməyə müraciət edib.

Nəşrin məlumatına görə, İsmayılova qarşı başqa kreditorların da iddiaları var. Belə ki, bir ildən çox əvvəl Sergey Yançukovun “Manqazeya” qrupu Kiprdə məhkəmə vasitəsilə 100 mln. dollarlıq iddia qaldırmaqla, oliqarxın aktivlərinin bir hissəsini dondurub. Amma “Manqazeya” hələlik milyarderin əmlakı üzərində real nəzarət əldə edə bilməyib.

İyunun sonlarında İsmayılov az qala Türkiyədə Mardan Palace otelindən məhrum olacaqdı.

Çoxmilyonluq borclarla əlaqədar Türkiyənin məhkəmə nəzarətçiləri oteli hərraca çıxarmağa hazırlaşırdılar, amma son anda İsmayılov Türkiyənin Halk Bankası bankı ilə borcun yenidən təşkil edilməsi haqqında razılıq əldə etməyə müvəffəq olub. Biznesmen yaxın 4 il ərzində banka 100 mln. dollar ödəmək öhdəliyi götürüb. -02D-