Partiya sədri müxalifət düşərgəsini xalqa hesabat verməyə çağırır

Böyük Azərbaycan Uğrunda Milliyətçi Hərəkat Partiyasının sədri Valeh İbadov müxalifət düşərgəsinə bəyanat ünvanlayıb.

Müəllifə görə, bu gün xalqdan müxalifət qüvvələrinə bir araya gələrək 22 il ərzində fəaliyyəti barədə hesabat verməsi barədə “sosial sifariş” var. Onun fikrincə, müxalifət qüvvələri adı çəkilən dövr ərzindəki uğursuzluqlarına da aydınlıq gətirməlidir. Müəllifə görə, xalq müxalifət qüvvələrinin çağırışlarına cavab vermir və bunun səbəbləri ciddi şəkildə araşdırılmalıdır. 

Daha sonra partiya sədri müxalifət düşərgəsini eks-prezdeint Əbülfəz Elçibəyin vəfatından sonra vahid liderə mlaik olmamaqda ittiham edir. Bununla yanaşı, müəllif müxalifət düşərgəsi ldierlərini, vaxtilə milli-azadlıq hərəkatında söz sahibi olanların vahid komanda kimi formalaşa bilməməkdə qınayır.

Müxalifət qüvvələrinin 22 il ərzində keçirilən seçkilərdə bir dəfə də olsun uğur qazana bilməməsinə toxunan müəllif bu işdəki nöqsanları araşdırmağı əsas məsələlərdən biri saydığını nəzərə çatdırır.

Bəyanat müəllifinə görə, müxalifət düşərgəsinin problemlərinin müzakirəsi üçün böyük bir toplantı keçirilməsinə ehtiyac var. Bu toplantıda müxalif siyasi partiyalardan tanınmış siyasi xadimlərə qədər hamının iştirakının vacibliyi vurğulanır.

Son olaraq, bəyanat müəllifi toplantının vaxtını və keçiriləcəyi məkanı tədbirin təşkili üzrə Təşkilat Komitəsinin təyin edəcəyi bildirilir. -05D-