İslam Partiyasının sədr əvəzi İlham Əliyevdir

İslam Partiyası İdarə Heyətinin (İH) cümə axşamı keçirilən növbəti toplantısında təşkilati məsələyə baxılıb.

Toplantıda Hacı Elçin Manafov sədr əvəzliyindən istefa verdiyini deyib və səbəblərini açıqlayıb. O, AİP-də mərhum sədr Hacı Əlikram Əliyevlə başlanan istefa mədəniyyəti ənənəsinə sadiq qalaraq bu addımı atdığını deyib.

İH üzvləri E.Manafovun 2011-ci ilin yanvar ayından partiyada sədr əvəzi vəzifəsini yerinə yetirdiyini deyiblər. E.Manafovun AİP üçün çətin bir məqamda, sədr Mövsüm Səmədovun saxta ittihamlarla həbsindən sonra, partiyaya təqib və təzyiqlər başlandığı zaman rəhbərliyi üzərinə götürdüyü xüsusi vurğulanıb. İH üzvlərinə görə, E.Manafov sədr əvəzi olduğu dövrdə partiyanı qorumağa, möhkəmləndirməyə nail ola bilib. İdarə Heyəti E.Manafovun istefasını qəbul edib və ona təşəkkür bildirib. Partiyada sədr əvəzi postu Hacı İlham Əliyevə həvalə edilib.

İ.Əliyev bir müddət öncə AİP-ə sədrin birinci müavini təyin edilib. İ.Əliyev də öz növbəsində sədr əvəzi kimi etimada görə İdarə Heyətinə təşəkkür edib.

Çıxış edənlər sədr əvəzi səlahiyyətlərini üzərinə götürən İ.Əliyevə çətin, amma şərəfli işdə uğurlar arzu ediblər

İH-nin toplantısı bununla başa çatıb.

Xatırladaq ki, AİP sədri Mövsüm Səmədov 2011-cu ildə həbs edilib. Ona qarşı bir sıra dövləti cinayətlərlə bağlı ittiham irəli sürülüb və 12 il müddətinə azadlıqdan məhrum edilib. -05D-