Vergilər Nazirliyi inzibati binanın tikintisinin ikinci mərhələsi üzrə müqavilə bağlayıb

Vergilər Nazirliyi “Renaissance Construction Azerbaijan” MMC ilə yeni inzibati binasının ikinci mərhələsinin tikintisi üzrə müqavilə bağlayıb. Bina 2014-cü ildən Heydər Əliyev prospektində tikilir. Bu barədə Turan-a Satınalmalar üzrə Dövlət Agentliyindən məlum olub.

Müqavilə qiyməti 18 mln 499 min 719 manatdır. 2013-cü ilin dekabrında tikintinin ilk mərhələsində “Aikon Cpit” şirkəti ilə 20 mln 796 min 670 manat məbləğində müqavilə bağlanmışdı.

Vergilər Nazirliyi tikintinin ümumi layihə qiymətini açıqlamır. 30 mərtəbəli olacaq binanın layihəsi də ictimaiyyətə təqdim edilməyib.

Vergilər Nazirliyi buna qədər “Renaissance Construction Azərbaycan” MMC ilə layihə-mühəndis işləri üzrə  4,5 mln manatlıq müqavilə bağlayıb.

  “Aikon Cpit” şirkətinin ofisinin “AtaHolding”ə məxsus Excelsior Hotel otelində olduğu məlumdur.

Digər tərəfdaş haqda daha çox məlumat var. Məsələn, 2010-cu ildə “Synergy Group” “Synergy Construction” şirkətinin şəxsində “REC ULUSLARARASI İNŞAAT YATIRIM SANAYİ VE TİCARET A. S” ilə  (“Renaissance Construction”un törəməsi, “Renaissance Holding”ə daxildir, Ankara, Türkiyə) «Renaissance Construction Аzerbaijan» MMC-ni təsis edib. Paylar bərabər bölünüb. Nizamnamə kapitalı $1,2 mln-dır.

“Synergy Group” bildirir ki, “Renaissance Construction Аzerbaijan” ticarət mərkəzləri, hökumət binaları, otel, ağır və yüngül sənaye zavodları və s. layihə və tikintisi üzrə ixtisaslaşır. “Renaissance Construction Azerbaijan”da 700-dək əməkdaş çalışır.

Hazırda “Renaissance Construction Azerbaijan” Şabranda "Qalaaltı Hotel SPA & Resort" tikir. Həmçinin Lenkaran Hotel & SPA, Shamkir Hotel & SPA və Synergy biznes mərkəzi və s. tikintisində iştirak edib. 08B