Yanacağın 0,02 manat bahalanması xəzinəyə 80 mln manat yol vergisi təmin edəcək

  Yanvarın 13-dən yol vergisi yanacağın qiymətinə əlavə edilib.

Tarif Şurası benzin və dizel yanacağını, eləcə də maye qazı 0,02 manat bahalandırıb.

İndi Aİ-92 0,72 manat,  dizel yanacağı 0,62 manatdır ( $0.79). Qazın pərakəndə qiyməti dəyişməyib.

Yol vergisinin yanacağın qiymətinə əlavə edilməsi özünü nə dərəcədə doğruldur?

Ekspertlərə görə, yol vergisi ildə bir dəfə texniki baxış zamanı alınırdı. Yeni avtomobillər 5 ildə bir dəfə baxışdan keçirilir, sonrakı 5 ildə isə iki ildən bir. Ona görə onları yol vergisinə cəlb etmək mümkün olmurdu. Ölkədə hər altıncı avtomobil vergidən yayınırdı.

Bu sxemi tətbiq etməklə hökumət yol vergisi ödənişini təmin edir, həm də Qərbdəki şüarı gündəliyə gətirir: “az get, az ödə”. Yəni vətəndaşlar şəxsi avtomobildən az istifadə etməyə təhrik edilir. Hərçənd hökumət buna qədər yaxşı ictimai nəqliyyat yaratmalıdır.  

2013-cü ildə yol vergisindən dövlət büdcəsinə 43,1 mln manat daxil olub. 2015-ci ildə yanacağın bahalanmasından büdcəyə  80 mln manat daxil ola bilər. Ölkədə 4 mln ton benzin və dizel yanacağı istehsal edilir.

Büdcənin xərclər hissəsi 21,1 mlrd manat olduğu halda bu addıma ehtiyac var idimi? Hökumət hesab edir ki, bu il çətin olacaq. Çünki neftin barreli  $90 olsa, büdcə kəsiri 1,7 mlrd manat təşkil edəcək. 2015-ci ilin əvvəlində  neftin barreli  $50 olub və azalmaqda davam edir. Ona görə israfçı hökumət hər manat uğrunda mübarizə aparacaq. Bu isə növbəti vergi yükləri deməkdir. –12А--