Yunanıstana ucuz qaz verilməsi mümkün deyil - ARDNŞ

Hazırda Yunanıstana TAP qaz kəməri ilə tədarük ediləcək Azərbaycan qazını ucuzlaşdırmaq mümkün deyil, deyə ARDNŞ-nin vitse-prezidenti Elşad Nəsirov bildirib.

Onun sözlərinə görə, ilk növbədə bu, beynəlxalq praktikaya uyğun deyil.

"Əgər müqavilə 25 illik müddət üçün bağlanılıbsa, orada bazar vəziyyətinin kəskin dəyişdiyi halda qazın qiymətinin dəyişməsi nəzərdə tutulub. Amma bu, yalnız qaz tədarükündən sonra baş verir. Qaz hələ daxil olmayıb, ona görə hazırda qazın qiymətinin dəyişməsini müzakirə etmək mənasızdır", - deyə o bildirib.

Nəsirov qeyd edib ki, qazın qiymətinin düşməsi nə Yunanıstan, nə Azərbaycan, nə də ARDNŞ-dən asılıdır.

"Qiymətlə bağlı müqavilə Yunanıstan şirkəti ilə Yunanıstana qaz tədarük edəcək 7 şirkətin daxil olduğu konsorsium tərəfindən imzalanıb. Bununla bağlı mexanizm Yunanıstan tərəfi və qazı tədarük edəcək və danışıqları həyata keçirən qrup tərəfindən işlənilib. Müqavilə imzalandıqdan sonra bu qrup öz fəaliyyətinə xitam verib. Məhz buna görə, qazın qiymətin aşağı salınması ilə bağlı danışıqları aparılacaq heç bir tərəf yoxdur", - deyə o izah edib.

E. Nəsirov Yunanıstan tərəfinin Azərbaycan qazını TAP layihəsi çərçivəsində nəql ediləcəyi tranzit haqlarının artımı ilə bağlı tələbinə də aydınlıq gətirib və bildirib ki, bu məsələ birbaşa Avropa İttifaqına ünvanlanacaq məsələdir.

Əvvəllər Bakıda "Cənub qaz dəhlizi" Məşvərət Şurasının iclasında iştirak edən Yunanıstanın energetika naziri Panayotis Lafazanis Afinaya qayıtdıqdan sonra demişdi ki, Yunanıstan hökuməti TAP qaz kəməri və IGB kəmərinin (Yunanıstan-Bolqarıstan interkonnektoru) tikintisini dəstəkləyir, amma tranzit gəlirini az hesab edri.

   Turan agentliyinin məlumatına görə, Yunanıstan üçün ayrıca qaz qiyməti yoxdur. Qazın qiyməti xüsusi formul ilə hesablanır, deyə ВР-Azerbaijan şirkətində Turan-a bildiriblər. Bu formul ilə hər rüb qiymətlər korrektə ediləcək. –12C--