İstanbulda Azərbaycan mənşəli Türk rəssamının fərdi sərgisi açılıb

İstanbuldakı Auditorlar Palatasının sənət qalareyasında Azərbaycan mənşəli Türk rəssamı,müasir Türk rəsm sənətinin tanınmış ustası Timur Taştekinin fərdi sərgisi açılıb.

Türkiyənin sənət ictimaiyyətinin,özəl qalareyaların sahiblərinin, kolleksiyaçıların və medianın yaxından maraq göstərdiyi sərgidə Timur Taştekinin müxtəlif vaxtlarda yağlıboya ilə çəkdiyi tablolar nümayiş etdirilir.

Fərdi sərgisinin açılış mərasimində Turan agentliyinə verdiyi açıqlamada rəssam Timur Taştekin deyib :"Bu, mənim 30-cu fərdi sərgim olduğuna görə,uzun müddət hazırlaşmışam.Auditorlar Palatasının sənət qalareyası Türkiyənin ən böyük sənət məkanlarından biridir, burada 100-ə yaxın əsərimi nümayiş etdirə bilirəm.İndiyə qədər Belçika, Fransa, Danimarka,Hollandiya və ABŞ-da fərdi sərgilərim olub.Hal-hazırkı sərgimdə yaradıcılığımın, demək olar ki, bütün mərhələlərini əks etdirən əsərlərimi nümayiş etdirirəm.Sərgimə göstərilən maraq və diqqət məni məmnun edir"

Timur Taştekin 1945-ci ildə Türkiyənin Ardahan vilayətinin Çıldır mahalında anadan olub.Uşaqlıq illəri Kür çayının sahilində keçən Timur Taştekin ibtidai məktəbdə oxuyarkən şəkil çəkməyə başlayıb.18 yaşında İstanbula gələn sənətkar 1970-ci illərin əvvəllərindən həm qrup sərgilərində iştirak edib həm də fərdi sərgilər açıb.Tanınmış rəssamın sözlərinə görə,öz sənətini inkişaf etdirməkdə İstanbulda yaşayan Azərbaycan rəssamları ilə yaratdığı yaxın əlaqənin də mühüm rolu olub.

"Tablolarıma yüksək qiymət qoyuram,onları satmağa qətiyyən tələsmirəm.Hər əsərimin üzərində 2-3 il işləyirəm, üzərində 10 il işlədiyim əsərlərim də var.Ona görə tablolarımın haqq etdikləri qiymətlərə satılmasını istəyir,ucuz qiymətə tablo satmıram.Əsərlərimin qiymətlərinin daim yüksəlməsindən razıyam.Bu, hər bir sənətkarın arzu etdiyi bir haldır"- Timur Taştekin Turana açıqlamasını bu sözlərlə bitirib.