İstanbulda məşhur Türkoloqun 120 illiyi qeyd edilib

İstanbulda Azərbaycan mənşəli alim,Türkiyə Türkologiyasının qurucusu professor Əhməd Cəfəroğlunun anadan olmasının 120 illiyinə həsr edilmiş simpozium keçirilib.

İstanbul universiteti və “Türk ocakları” qurumu İstanbul şöbəsinin birgə təşkil etdiyi simpoziumun açılışında çıxış edən universitetin ədəbiyyat fakültəsinin dekanı, professor Fikrət Turan agentliyinə  bildirib ki, biz Əhməd Cəfəroğlu kimi alimlərə çatmağa çalışsaq da bunun mümkün olmadığını görürük.Türkiyədə dilçilik Cəfəroğlu kimi möhtərəm bir alimin sayəsində inkişaf edərək bu günkü səviyyəsinə gəlmiştir.

”Türk ocakları” qurumu İstanbul şöbəsinin sədri,fizika-riyaziyyat elmləri doktoru Cezmi Bayram da simpoziumun açılışındakı çıxışında “Əhməd Cəfəroğlu kimi   böyük bir alimi hər gün yada salmaq hamımızın borcu olmalıdır. Bu minvalla gələcək nəsillərin də bizləri xatırlayacağına inanıram”- deyə vurğulayıb. Daha sonra professor Əhməd Cəfəroğlunun qızı, İstanbuldakı Sakıp Sabancı muzeyinin direktoru,sənətşünaslıq doktoru Nazan Ölçer, Əhməd Cəfəroğlunun bakalavr, magistratura və doktorantura  tələbələri olmuş  və bu gün Türkologiya elmində mühüm yerləri olan professorlar onun barəsində xatirələrini danışıblar.

Turan agentliyinin Türkiyə təmsilçisi, filologiya elmləri namizədi Mayis Əlizadə professor Cəfəroğlunun Azərbaycanda da böyük  bir alim kimi qəbul edilməsindən, sovet vaxtında ona böhtan atanların adlarının bu gün xatırlanmamasından,əvəzində Əhməd Cəfəroğlunun Azərbaycanın da qəlbində yaşayan mühüm bir alim-vətənpərvər  olmasından danışıb.

Simpoziumun axırında  iştirakçılara “Doğumunun 120.yılında Prof.Dr.Ahmet Caferoğlu hatıra kitabı”  hədiyyə verilib. İstanbuldakı Kerem Aydınlar fondunun maddi dəstəyi ilə çap edilən kitabda Türkiyədən və dünyadan 33 alimin məqalələri var.

Türkiyə Türkologiyasının qurucusu professor Əhməd Cəfəroğlunun anadan olmasının 120 illiyi 10-11 dekabr tarixlərində Cəfəroğlunu doğum yeri olan Gəncə şəhərində qeyd ediləcək.

1899-cu ildə Gəncədə  anadan olan Əhməd Cəfəroğlu 1919-cu ildə İstanbul universitetinə qəbul edilib. Doktorantura təhsili üçün 1924-cü Almaniyaya göndərilən Cəfəroğlu 1929-cu ildə dissertasiya müdafiə edərək Türkologiya sahəsində Türkiyənin ilk elmlər doktoru ünvanını alıb.1946-cı ildə İstanbul universiteti Türkologiya institutunun direktoru təyin edilən professor Cəfəroğlu ikinci və üçüncü nəsil Türkoloqların yetişdirilməsində əvəzsiz rol oynayıb.Alim Türkiyənin bütün bölgələrini dolaşaraq Anadolu dialektləri  barədə 12 cildlik kitab yazıb.Ümumiyyətlə isə professor Cəfəroğlunun 24 kitabı və 300-dən çox elmi məqaləsi çap edilib.

6 yanvar 1975-di ildə vəfat edən professor Əhməd Cəfəroğlunun əleyhinə akademik Firidun Köçərli və “Kommunist” qəzetinin kolxozlar üzrə müxbiri Rəfail Nağıyevin imzalarıyla  yazılar  çap edilib.