Türkiyənin tanınmış tədqiqatçı-jurnalistlərinin yeni kitabı çıxıb

Ankara/13.04.23/Turan: Müasir Türk jurnalistikasının iki tanınmış tədqiqatçı-jurnalisti Barış  Pehlivan və Barış Terkoğlunun növbəti araşdırma kitabı çapdan çıxıb. Ölkənin ən böyük nəşriyyatı olan “Kırmızı Kedi Yayınları”ndan çıxan “SS” adlı kitab Türkiyənin hazırkı daxili işlər naziri Süleyman Soylunun  həm pərdə önündə,  həm də pərdə arxasında siyasətçilər, təriqət nümayəndələri, iş adamları, yeraltı dünyasının cəmiyyətdə tanınan adamlarıyla   münasibətlərinin araşdırılmasına həsr edilib.

2011-ci ildə Fətullahçı Terror Təşkilatınınn (FETÖ) dövlət qurumlarında, xüsusilə, polis və məhkəmə orqanlarındakı fəaliyyətlərinə dair kitab yazan Barış Pehlivan və Barış Terkoğlu tutularak 20 ay həbsxanada qalmışdılar.

“SS”  kitabının  birinci nəşrinin tirajı 100 min ədəddir. Türkiyənin siyasət həyatına yeniyetməlik illərində atılan Süleyman Soylu mərkəz sağın önəmli qurumlarından biri olan Doğru Yol Partiyasının gənclik təşkilatında çalışıb.

Tədqiqatçı-jurnalistlər Soylunun siyasi karyerasının ilk dönəmlərindən başlayaraq cəmiyyətin müxtəlif təbəqələrinə mənsub adamlarla münasibətlərini sənədlərlə işıqlandırıblar. Daxili işlər nazirilə bağlı müxtəlif vaxtlarda gündəmə gətirilən iddialar kitabda sənədlər, fotolar, qəzet materiallarıyla birlikdə oxuculara təqdim edilib.

22 iyul 2007-ci ildə keçirilmiş parlament seçkisində Doğru Yol Partiyası 10%-lik ölkə baryerini keçə bilməyincə partiyanın sədri istefa vermiş və Süleyman Soylu partiyanın sədri seçilmişdi.

O vaxtlar Türkiyə iqtidarını, xüsusilə, baş nazir Tayyip Erdoğanı kəskin şəkildə tənqid edən Süleyman Soylunun sözlərinə kitabda geniş yer verən tədqiqatçılar onun 2012-ci ildə Erdoğanla görüşəndən sonra AKP-yə keçərək sürətlə yüksəlməsinin pərdə arxasında Qərb ölkələrinin müəyyən planlarının durduğunu iddia ediblər.

İqtidar partiyasının idarə orqanlarında yüksək vəzifələr verilən Süleyman Soylu partiyanın tərəfdarları arasında getdikcə nüfuzunu artıraraq  1 noyabr  2015-ci ildə Trabzon millət vəkili seçilərək əmək və sosial təminat naziri olmuşdu.

FETÖ-nün 15 iyul 2016-cı ildə hərbi çevrilişə cəhd etməsindən 2 ay sonra daxili işlər naziri vəzifəsinə gətirilən Soylu xüsusilə, ölkənin cənub-şərq bölgələrində terror təşkilatının fəaliyyətinin minimuma enməsində qərarlılıq nümayiş etdirməklə yanaşı, nazirin ana müxalifət  partiyası və xüsusilə, partiyanın lideri, azad media və qeyri-hökumət təşkilatları üzərində yaratdığı və   böyük narazılığa səbəb olmuş  təzyiq mexanizminin xüsusiyyətləri də kitabda araşdırılıb.

Türkiyənin iki önəmli tədqiqatçı-jurnalistinin “SS” kitabında daxili işlər naziri olana qədər və olandan sonra Soylunun illeqal təşkilatları  və cinayət törətmiş adamları himayə etməsinə dair ciddi iddia və ittihamlar yer almaqdadır.

Müəlliflər kitabı yazarkən məhkəmə stenoqramlarına, keçmişdə polis orqanlarında işləmiş ancaq daha sonra uzaqlaşdırılmış şəxslərin açıqlamalarına, mətbuat materiallarına və əldə etdikləri dəlillərə geniş yer veriblər. 18 dekabr 2002-ci ildə alim Necip Hablemitoğlunun ölümüylə bağlı aparılan istintaq işinə daxili işlər nazirinin müdaxilə etdiyini iddia edən tədqiqatçı-jurnalistlər 30 dekabr 2022-ci ildə  alim Sinan Ateş qətlə yetiriləndən sonra nazirin heç bir açıqlama verməməsini tənqid ediblər.

İqtidar partiyasında Süleyman Soylu ilə münasibəti yaxşı olmayan idarəçilərin olduğunu iddia edən müəlliflər onun təriqət şeyxlərilə münasibətlərinin konstitusiyaya və qanunlara zidd olduğunu vurğulayıblar.

Kitabda daxili işlər nazirinin FETÖ ilə münasibətlərində indiyə qədər cəmiyyətə çox məlum olmayan iddia və faktlara da geniş yer verilib. “SS” kitabını oxuyarkən dövlət idarəçiliyinin son 6,5 ilində prezident Erdoğandan sonrakı ən aktiv və təsir gücü böyük simasının müxtəlif səpkili  münasibətləriinin müəlliflərin gözündən qaçmadığını görürük (bunların içində iqtidar partiyasına yaxınlığıyla bilinən və bir gənci  zorlayan  iş adamının nazir tərəfindən himayə edildiyinə dair iddia da var).

Türkiyədə tədqiqatçı-jurnalistikanın yeni örnəyi olan “SS” kitabında  gündəmə gətirilən və əksəriyyəti faktlarla dəstəklənən məsələlərə dair daxili işlər naziri hələ ki açıqlama verməyib.

14 maydakı seçkidə millət vəkilliyinə İstanbulun üçüncü bölgəsinin birinci sırasından namizəd olan Süleyman Soylunun nazir kreslosuyla vidalaşması gözlənilir.