Ombudsman, Xarici İşlər Nazirliyi və Baş Prokurorluq Ermənistanda azərbaycanlı əsgərlərə işgəncə verilməsi haqda

Bakı/13.04.23/Turan: Azərbaycanın ombudsmanı Səbinə Əliyeva Ermənistanda saxlanılan azərbaycanlı əsgərə işgəncə verilməsilə bağlı bəyanatla çıxış edib.

Ermənistan KİV-də Azərbaycan Silahlı Qüvvələrinin əsgərinə qarşı işgəncə və qeyri-insani rəftarla bağlı foto və videomateriallar yayılıb.

Ombudsman beynəlxalq təşkilatlara müraciət edərək onları reaksiya verməyə və Ermənistanı beynəlxalq hüququn tələblərinə əməl etməyə çağırmağa səsləyib.

O həmçinin Beynəlxalq Qırmızı Xaç Komitəsinin Ermənistandakı nümayəndəliyindən təcili olaraq azərbaycanlı hərbçilərə baş çəkməyi və onların vəziyyəti barədə məlumat verməyi tələb edib.

Azərbaycan Xarici İşlər Nazirliyinin rəsmi nümayəndəsi Ayxan Hacızadə də hərbi qulluqçuya işgəncə verilməsi faktını şərh edib. "Bir neçə gün öncə Naxçıvanın Şahbuz rayonu istiqamətində itkin düşmüş azərbaycanlı hərbçilər Ermənistanda saxlanılıb. Onları amansızcasına döyüblər və işgəncə veriblər. Bu cür müraciət beynəlxalq humanitar hüquqa ziddir, tamamilə yolverilməzdir və beynəlxalq səviyyədə qınanmalıdır!",- Hacızadə Tvitterdə yazıb.

Öz növbəsində, Baş Prokurorluğun İstintaq İdarəsi əsir əsgərə işgəncə verilməsi faktı üzrə cinayət işi açıb. Baş Prokurorluq xarici ölkələrin müvafiq orqanlarına müraciət edəcək və Azərbaycan vətəndaşlarına qarşı hüquqazidd hərəkətlər törətmiş şəxslərin cəzalandırılması üçün beynəlxalq təşkilatlarla əməkdaşlıq edəcək. 06B