10 məmurun barəsində cinayət işi başlanıb

Bakı/09.06.22/Turan: Azərbaycanın bir sıra şəhər və rayonlarında torpaqların özəlləşdirilməsi zamanı qanunsuz hərəkətlərə görə Əmlak Məsələləri Dövlət Xidmətinin və bələdiyyə orqanlarının 10 vəzifəli şəxsi məsuliyyətə cəlb edilib. Bu barədə Baş Prokurorluğun mətbuat xidmətinin məlumatında deyilir.

Əsasən Dövlət Xidmətinin Şirvan şəhər şöbəsinin rəisi Nazim Səfərov, Ucar ərazi şöbəsinin rəisi Amil Aslanov, Qazax rayonu Daşsalahlı bələdiyyəsinin sədri Asif Yusifov, Şəki rayon Qoxmuq bələdiyyəsinin sədri Etibar Eyvazov və Kürdəmir Rayon İcra Hakimiyyəti başçısı aparatının sosial-İqtisadi İnkişafın təhlili və proqnozlaşdırılması şöbəsinin müdir müavini Ruslan Əliyevin cinayətkar fəaliyyətdə iştirak etmələri müəyyən edilib.

İstintaqla müəyyən edilib ki, 2020-2022-ci illərdə həmin şəxslər Dövlət Əmlak Məsələləri Xidmətinin torpaqların dövlət idarəetməsinin təşkili və geodeziya şöbəsinin sektor müdiri İldırım Məmmədovla əlbir olaraq bələdiyyə mülkiyyətində olan torpaq sahələrinin mülkiyyətə, istifadəyə və icarəyə verilməsinə dair müsbət rəyin verilməsinə görə rüşvət aıblar.

Ümumilikdə 10 nəfər məsuliyyətə cəlb edilib, onların barəsində həbs, ev dustaqlığı və digər qətimkan tədbirləri seçilib.

Onlara qarşı Cinayət Məcəlləsinin 308.2 (vəzifə səlahiyyətlərindən sui-istifadə etmə ağır nəticələrə səbəb olduqda), 311.3.1, 311.3.2, 311.3.3 (rüşvət alma külli miqdarda törədildikdə), 312.1 (rüşvət vermə) və digər maddələrlə ittiham irəli sürülüb.

Hazırda qanunsuz əməllərə yol vermiş digər vəzifəli şəxslərin müəyyən edilərək məsuliyyətə cəlb olunması istiqamətində istintaq davam edir.