20 Yanvarın 27-ci ildönümünə həsr olunmuş tədbirlər planı təsdiq olunub

Ölkənin Prezident Administrasiyasının rəhbəri Ramiz Mehdiyev Yanvar faciəsinin 27-ci ildönümünə həsr olunmuş Tədbirlər Planını təsdiq edib.

Xüsusən, bütün ölkə üzrə 20 Yanvar hadisələri ilə bağlı konfransların, toplantıların və mühazirələrin keçirilməsi, tamaşaların, bədii və sənədli filmlərin nümayişi, bu tədbirlərin KİV-də işıqlandırılması nəzərdə tutulur.

Ölkənin bütün təhsil müəssisələrində faciəyə həsr olunmuş xüsusi dərs keçiriləcək, ölkənin əsas dini konfessiyaları isə faciə qurbanlarının xatirəsinə həsr olunmuş dini mərasimlər keçirəcək.

Çoxillik ənənəyə uyğun olaraq, 2017-ci il yanvarın 20-də ölkə sakinlərinin Şəhidlər Xiyabanını ziyarəti təşkil olunacaq.

Həmin gün saat 12-də bütün ölkə ərazisində şəhidlərin ruhu bir dəqiqəlik sükutla yad ediləcək, dəniz gəmiləri, avtomobillər və qatarlar səs siqnalı verəcək, bayraqlar endiriləcək.

Qeyd edək ki, matəm mərasimlərinin keçirildiyi müddət ərzində ilk dəfədir ki, bu plan dövlət başçısı tərəfindən deyil, administrasiya rəhbəri tərəfindən təsdiq olunur. -02D-