2015-ci il büdcəsində partiyalara, QHT-lərə və elmə ayrılan maliyyə vəsaiti artırılıb

Deputatların təklifləri nəzərə alınmaqla, dövlət büdcəsinin yekun variantına bir sıra dəyişikliklər edilib, lakin bu dəyişikliklər ümumi xərclər və gəlirlər məbləğinə təsir etməyib.

Cümə günü parlamentdə çıxış edən maliyyə naziri Samir Şərifov bildirib ki, 2015-ci ildə QHT-lərin maliyyələşdirilməsinə əlavə olaraq 600 min manat ayrılacaq.

Elmin maliyyələşdirilməsinə 8 mln. manat əlavə olunaraq, ümumi məbləğ 150,5 milyon manata çatdırılıb. Beləliklə, 2015-ci ildə elm müəssisələrinin maliyyələşdirilməsi 2,5% artacaq.

2015-ci ildə siyasi partiyaların ehtiyacları üçün bu il istifadə olunmamış vəsaiti – 250 min manatı əlavə etmək qərara alınıb. Bu, bu il təklif edilmiş məbləğdən 10% çoxdur.

Deputatlar həmçinin bələdiyyələrin dövlət tərəfindən maliyyələşdirilməsini artırmağı təklif ediblər. S.Şərifov bildirib ki, hökumət bələdiyyələrin gəlirliliyini “Bələdiyyələr haqqında” qanuna dəyişikliklər etməklə artırmağı qərara alıb. Bu qanun onlara tabeliklərində olan ərazidə yığılmış verginin bir hissəsini öz büdcələrində saxlamağa imkan verir. Şərifovun sözlərinə görə, dəyişiklik sayəsində bələdiyyələr 40 mln. manat gəlir əldə edəcəklər. -06В-