90 saylı Ağdaş seçki dairəsi üzrə təkrar parlament seçkiləri

Bu gün 90 saylı Ağdaş seçki dairəsi üzrə Milli Məclisə təkrar seçkilər keçirilir. Deputat mandatı uğrunda 7 namizəd mübarizə aparır. Onların sırasında hakim Yeni Azərbaycan Partiyasından namizəd, Ağdaş  Rayon  İcra Hakimiyyəti başçısının birinci müavini Cavid Osmanov və Ümid Partiyasının  lideri İqbal Ağazadə də var.

Digər beş namizəd bitərəfdir: müəllim Rəşad Abdullayev,  “Azəravtoyol” ASC-nin təhlükəsizlik xidmətinin əməkdaşı Elmir Gözəlov, “Azərpoçt” MMC Ağdaş  filialının müfəttişi Rəşid Gözəlov, Ağdaş Mərkəzi Rayon Xəstəxanasının həkimi Əli Haqverdiyev, Ağdaş humanitar kollecinin müəllimi Anar İbrahimli.

Əsas mübarizənin Osmanov və Ağazadə arasında gedəcəyi gözlənilir.

Səsvermə saat 8:00-da başlayıb və saat 19:00-da başa çatacaq. Axşamdan keçmiş MSK-nın saytında səsvermənin nəticələrinə dair ilkin məlumatlar dərc edilməlidir.

Dairə seçki komissiyası seçkilər başa çatdıqdan 48 saat sonra yekun protokolu MSK-ya təqdim etməlidir.

MSK 20 gün ərzində seçkilərin nəticələrini yoxlamalı və elan etməlidir. Bundan sonra Konstitusiya Məhkəməsi 10 gün ərzində seçkilərin nəticələrini yoxlamalı və elan etməlidir.

Ən çox səs toplayan namizəd seçkilərdə qalib sayılacaq.

Qeyd edək ki, 2015-ci il seçkilərində İ.Ağazadə Bakının Xətai rayon dairəsindən deputatlığa namizədliyini irəli sürmüşdü, lakin rəsmi məlumatlara görə, parlamentə düşməyib. İ.Ağazadə səsvermənin nəticələrilə bağlı etirazını bildirib, lakin onlara yenidən baxılmasına  nail ola bilməmişdi.

90 saylı Ağdaş seçki dairəsi üzrə təkrar seçkilər 1 noyabr 2015-ci il parlament seçkilərinin nəticələrinin ləğvilə əlaqədar təyin edilib. Seçkilərdə AGBank-ın rəhbəri Çingiz Əsədullayev qalib gəlib. Lakin səsvermə zamanı pozuntular olduğundan nəticələr ləğv edilib. Ancaq müxalifətçi namizədlərin çoxsaylı pozuntu faktları təqdim etmələrinə baxmayaraq, onlarla başqa dairədə belə qərarlar qəbul  edilməyib.  Qeyri-rəsmi məlumatlara görə, Ağdaşda seçkilərin ləğvinə Ç.Əsədullayevin keçmiş milli təhlükəsizlik naziri Eldar Mahmudova yaxınlığı səbəb olub.—06D--