Media-icmal 18.06.2016

Azərbaycanın beynəlxalq miqyaslı idman yarışlarına ev sahibliyi etməsi, hökumətin seçki saxtakarlığı, keyfiyyətsiz qazın insan tələfatlarına səbəb olması, indiki ağır durumda idman yarışlarına vəsaitlərin xərclənməsinə birmənalı olmyan münasibət bugünkü medianın aparıcı mövzusudur.         

Idman  yarışları məkanı –Azərbaycan

“Azərbaycan” qəzeti ölkədə “Formula-1” yarışları ilə bağlı pilotların trekə bələd olmaq üçün başladıqları avtomobil yürüşlərinə dair “Formula-1” həyəcanı başladı” məqaləsilə çıxış edib.

Həm də müəllif bu yarışlara təkcə idman yarışması kimi baxmır, əhatə dairəsini bir az geniş götürür. Müəllifə görə,  “Dünya ölkəmizin inkişafının, xalqımızın qonaqpərvərliyinin və zəngin mədəniyyətinin bir daha şahidi oldu”.

Müəllifə görə, bu  Azərbaycanı tanıtım fürsətidir. “Belə bir möhtəşəm yarışın Azərbaycanda keçirilməsi dünyaya növbəti dəfə azərbaycanlıların mehribanlığı, qonaqpərvərliyi, qədim tarixi, füsunkar təbiəti, mentaliteti, sürətlə inkişaf edən müasir ölkə ilə tanışlıq fürsəti verib”.

Müəllifin fikrincə, hətta bu məsələdə də uğur qazanılıb, belə ki, çoxlu sayda siyasi, mədəni, idman və digər səpkili tədbirlərin ən mötəbər ünvanına çevrilən respublikamız növbəti beynəlxalq tədbirə layiqincə ev sahibliyi etməklə dünyanın diqqətini Bakıya cəlb edib.

Müəllifə görə, burada əldə edilən uğurlardan biri də ölkənin irimiqyaslı idman yarışlarının keçirilməsi məkanına çevrilməsidir: “Beləliklə, ölkəmizə gələn turistlər, dünyanın aparıcı pilotları, avtomobil mütəxəssisləri Azərbaycanla daha yaxından tanış oldular, onun inkişafını gözləri ilə gördülər. Azərbaycan bu yarışa yüksək səviyyədə ev sahibliyi etməklə bir daha sübut edir ki, beynəlxalq tədbirlərin keçirilməsi üçün əsas ünvanlardan biridir”.

Hakimiyyətin oğurluq rekordu

“Azadlıq” qəzeti seçki saxtakarlığı ilə bağlı Avropa İnsan Haqları Məhkəməsinin Azərbaycanla bağlı 19 qərar çıxarmasına diqqət çəkir. Qəzetdə dərc edilən “Hakimiyyətin saxtakarlıq rekordu” sərlövhəli məqalədə bu rəqəmin rekord rəqəm olduğu deyilir. Müəllif isə bu faktın özünü belə dəyərləndirir. “Bu əslində saxtakarlığın, oğurluğun, qanunsuzluğun rekordudur. İndi bütün dünya bir daha əmin olur ki, bu ölkədə seçilmirlər, təyin edilirlər. Artıq şübhə yeri qalmır ki, bu ölkənin parlamenti alver məkanıdır, mandata sahib olmaq üçün xalqın səsi önəmli deyil”.

Müəllif parlament üzvlərini saxtakarlıq nəticəsində “başqalarının yerlərində əyləşmiş şəxslər” adlandırır və bu şəxslərin utanmaq kimi bir hiss keçirmədiklərini vurğulayır. “Bizim deputatlar isə başqasının  haqqını bilərəkdən oğurlayır, başqasının haqqını bilərəkdən yeyir, utanmadan da şəffaf seçkidən, qanunun aliliyindən danışırlar”.

Məqalədə hökumətin seçki saxtakarlığı tərbiyəsiz uşaq hərəkəti kimi qiymətləndirilir: “Tərbiyəsiz uşağın evinə hər gün qonşular şikayətə gəldiyi kimi bizim hökumətimiz də ölkəyə ancaq şikayət gəirir”.

Müəllifə görə, Avropa məhkəməsinin qərarları Azərbaycan hakimiyyətinin mahiyyətini üzə çıxarıb. Məqalədə deyilir ki, hökumət bu qərarlara etiraz edə bilmir, ona görə də haqqı oğurlananlara təzminat ödəyir.

Can alan keyfiyyətsiz qaz

“Novoye Vremya” qəzeti “Yerli istelakçıların enerji təhlükəsizliyi təhlükədə?” sərlövhəli məqalədə əhaliyə keyfiyyətsiz qaz verilməsi məsələsini araşdırır.

Müəllif qeyd edir ki, əvvəllər dəm qazından zəhərlənmələr ən çox qış aylarına təsadüf edirdi, indi isə artıq belə bölüm yoxdur, dəm qazı nə zaman istəsə can ala bilir. Məqalədə adətən “Azəriqaz”ın bu zəhərlənmələri istifadə edilən cihazların yararsızlığı, qaz sızmaları ilə izah etdiyi vurğulanır. Amma əhaliyə verilən qazın keyfiyyəti barədə danışılmadığı yada salınır. Müəllif ekspertlərin qazın keyfityyətsiz olması haqda dediklərini “Azəriqaz”ın cavabını təqdim edir: “Amma “Azəriqaz” daim bu mövqeləri qəti şəkildə rədd edərək əhaliyə verilən qazın bütün normalara uyğun olmasında israr edirdi”.

Məqalədə qeyd edilir ki, Energetika Nazirliyi məhz verilən əhaliyə verilən qazın keyfiyyətini yoxlamaq üçün xüsusi nəzarətedici laboratoriya yaradır və yaxın iki-üç ayda bu laboratoriya yoxlamalar keçirəcək. İdarənin hüquqşünası Samid Əliyev deyir: “Dəm qazından zəhərlənmələrlə bağlı qazın keyfiyyəti heç zaman yoxlanılmayıb. Biz zəhərlənmələrə səbəblərdən biri kimi qazın keyfiyyətsiz olmasını görürük ”. Daha sonra müəllif S.Əliyevə istinadən “Azəriqaz”ı mənzillərdə qazın keyfiyyətini yoxlamamaqda ittiham edir.

Müəllif əhalinin təhlükəsizlik məsələsi olan belə bir qurumun bu qədər gec yaradılmasına görə bu sahəyə aid qurumları ciddi tənqidə məruz qoyur və belə hesab edir ki, sahənin qurumları Avropanın təhlükəsizliyinə o qədər aludə olublar ki. xalq yaddan çıxıb.

Itirilən milyonlar

İqtisadçı Qubad İbadoğlu “Bizim Yol” qəzetinə indiki ağır iqtisadi durumda idman yarışlarına milyonlarla vəsaitlərin ayrılmasının nə dərəcədə məqsədəuyğun olub- olmadığını araşdırır. Onun sözlərinə görə, bu il hökumət idman yarışlarına yarım milyard manata yaxın vəsait ayırıb. Onun fikrincə, bu yarışlar dövlət büdcəsindən əlavə mənbələrdən də maliyyləşirlər.

İqtisadçı-ekspert indki halda belə yarışları maliyyələşdirməyə zərurət olmadığını deyir: “Fikrimizcə, dövlət maliyyəsində çətinliklərin müşahidə olunduğu indiki zamanda 100 milyonlarla vəsaitin bu məqsədlər üçün xərclənməyinə dəyməz. Çünki idman infrastrukturunun formalaşdırılması deyil, onun saxlanılması  da büdcənin yükünü artırır, adətən bu məqsədli xərcləmələrin dinamikası pozitiv olur. Odur ki, istənilən halda belə yarışlardan iqtisadi mənada qazanclar itkilərdən dəfələrlə az olur”.