92 gündür aclıq edən Fazil Qasımov BMT və Qızıl Xaç Komitəsinin nümayəndələri ilə görüşmək istəyir

İstanbul Universitetinin doktorantı Fazil Qasımov “qanunsuz saxlanılmasına” etiraz əlaməti olaraq 92 gündür aclıq edir.

Bu gün qardaşı Nazim Qasımov Penitensiar Xidmətin Müalicə Müəssisəsində onunla görüşüb. Onun sözlərinə görə, F.Qasımovun vəziyyəti gündən-günə pisləşir.

“O, dəyənəkdən tutaraq, çətinliklə hərəkət edirdi. Fazilin çəkisi iki dəfə azalıb, güclü baş ağrıları və daxili orqanlarında ağrılar var, gözləri qaralır. Biz Penitensiar Xidmətin əməkdaşlarının nəzarəti altında söhbət etdik”, deyə qardaşı bildirib.

O qeyd edib ki, Fazil ona qarşı bütün ittihamların ləğv edilməsini tələb edir, belə ki, o, cinayət törətməyib. Eyni zamanda, o təkrar edib ki, onu məcburi şəkildə yedirməyə çalışsalar intihar edəcək.

Fazil Qasımov qardaşı vasitəsilə KİV-ə BMT-nin Bakı ofisinin və Beynəlxalq Qızıl Xaç Komitəsinin nümayəndələrinin ona baş çəkməsi xahişini çatdırıb. 

* 1 saylı Bakı İstintaq Təcridxanasının tibb-sanitariya hissəsində saxlanılan Fazil Qasımov iyulun 26-da səhhətinin kəskin şəkildə pisləşməsi ilə əlaqədar Penitensiar Xidmətin tibb-sanitariya hissəsinə köçürülüb. 

Qasımov 8 avqust 2023-cü il tarixində İstanbulda həbs edilib və Azərbaycana gətirilib. Burada o, iqtisadçı Qubad İbadoğlu ilə birlikdə saxta pul hazırlamaqda (CM-in 204.3.1-ci maddəsi) ittiham olunub.

Hazırda Fazil Qasımovun cinayət işinə Qubad İbadoğluna qarşı cinayət işindən ayrılıqda baxılır.