ABŞ dövlət katibinin Gürcüstan səfərinin yekunları haqqında

Kerrinin Gürcüstana səfəri konkret nəticələr verib, bu barədə hökumətin iclasında baş nazir Georgi Kvirikaşvili bildirib.

“Bu, çox uğurlu səfər idi, bizim aramızda kifayət qədər faydalı dialoq olub. Bundan başqa, Kerrinin səfəri dəstəyin təsdiqidir. Səfərin NATO-nun Varşava sammiti ərəfəsində baş tutması da böyük əhəmiyyət daşıyır. Bu, ölkəmizin Avroatlantik birliyə inteqrasiyasına dəstəyi təsdiq edir”, deyə Kvirikaşvili bildirib.

Bundan başqa, ABŞ dövlət katibi ilə görüşün yekunlarına görə mühüm sənədlər, o cümlədən “Gürcüstan və ABŞ arasında müdafiə və təhlükəsizlik sahəsində tərəfdaşlığın dərinləşdirilməsi haqqında Memorandum” imzalanıb.

Kvirikaşvili ölkələr arasında təhsil sahəsində əməkdaşlığın dərinləşdirilməsi haqqında sənədin də xüsusi əhəmiyyətini vurğulayıb. Bu müqavilədə söhbət Fulbrayt (Fulbright) akademik mübadilə proqramının genişləndirilməsindən gedir.

“Bunun nəticəsində Gürcüstanın daha çox tələbə və araşdırmaçıları proqramın təqaüdçüsü ola biləcək”, deyə Kvirikaşvili bildirib.

Onun sözlərinə görə, Xartiya çərçivəsində həyata keçirilən iqtisadi əməkdaşlıq da genişləndirilir.

Kvirikaşvili bildirib ki, ABŞ dövlət katibi ilə görüşlərdə ABŞ-ın Beynəlxalq İnkişaf Agentliyinin (USAİD) Gürcüstanda yeni layihəsinin genişləndirilməsi məsələsinə baxılıb.

“Biz USAİD-in Gürcüstanın regionlarında, xüsusən işğal xəttinə yaxın ərazilərdə yerləşən regionlarda iqtisadi inkişafa yardım nəzərdə tutan yeni layihəsinin genişləndirilməsi məsələsinə baxmışıq. İlkin hesablamalara görə, layihənin həyata keçirilməsi nəticəsində Gürcüstanın beş regionunda 2000-ə yaxın yeni iş yeri yaradılacaq”, deyə baş nazir bildirib.

ABŞ dövlət katibi Gürcüstandan Kiyevə gedib. -02D-