ABŞ Gürcüstanda seçkiləri "yaxından izləyəcək"

Çərşənbə axşamı ABŞ bildirib ki, Gürcüstanda keçiriləcək seçkiləri Rusiyapərəst hakim partiyanın "saxtalaşdıra" biləcəyindən ehtiyat edərək seçkiləri "yaxından izləyəcək". "Biz istəyirik ki, Gürcüstanda azad və ədalətli seçkilər keçirilsin və biz qarşıdakı günlərdə bunu yaxından izləyəcəyik", - Dövlət Departamentinin mətbuat katibi Metyu Miller hakim Gürcü Arzusu Partiyasının 26 oktyabr seçkilərini saxtalaşdırmaq cəhdlərilə bağlı Turan-ın  sualını cavablandırarkən deyib.

Gürcüstan prezidenti Salome Zurabişvili hakim partiyanı qarşıdakı seçkiləri saxtalaşdırmaq məqsədilə opponentləri qorxutmaqda ittiham etdikdən sonra ABŞ və Avropa  İttifaqı bununla bağlı narahatlığını bildirib.

Zurabişvili Financial Times-a bildirib ki, onun ölkəsini "Rusiya hökuməti" idarə edir. O, seçiciləri Avropa İttifaqı və Rusiya arasında seçim etməyə çağırıb.

2012-ci ildən hakimiyyətdə olan Gürcü Arzusu Partiyası Rusiyada olduğu kimi təbliğat və hədə-qorxuya əsaslanan kampaniya aparıb.

Müxalifət və vətəndaş cəmiyyəti liderləri ehtiyat edirlər ki, əgər onlar  40 faiz  səs toplasalar, hakim partiya nəticələri saxtalaşdırmağa cəhd edə bilər ki, bu da kütləvi nümayişlərə səbəb olar. Hakimiyyət buna çox güman ki, polisin köməyilə repressiyalarla cavab verəcək,  Financial Times yazır.

Bazar ertəsi Avropa İtifaqı xarici siyasət idarəsinin rəhbəri Jozep Borrel bildirib ki, Gürcüstanın hakim partiyasının son hərəkətləri "avtoritarizmə doğru dəyişikliyə işarə edir", odur ki, Gürcüstanın Avropa İtifaqına daxil olması prosesi "de-fakto dayandırılıb".

"Gəlin, qarşıdakı parlament seçkilərini gözləyək, bu, Gürcüstanda demokratiya üçün  və onun Avropa İttifaqına yolunda həlledici sınaq olacaq", -  Borrel bazar ertəsi Brüsseldə brifinqdə deyib.