ABŞ-ın Azərbaycana qarşı siyasəti dəyişəcəkmi?

Amerikada keçirilən prezident seçkiləri Azərbaycanda da izlənilir. Gecə saatları olmasına baxmayaraq, ölkənin hakim Yeni Azərbaycan Partiyasının rəhbərliyi istisna olmaqla, demək olar ki, aparıcı siyasi partiyaların, QHT-lərin rəhbərləri, hüquq-müdafiəçiləri, politoloqlar, çoxsaylı ictimaiyyət nümayəndələri  seçkiləri izləmək üçün Bakıda Hyatt Regency hotelində bir araya gəlib.

ABŞ-ın Azərbaycandakı səfiri Robert Sekuta Amerika seçki demokratiyası və  seçkilərdən sonra Azərbaycanla münasibətlər barədə danışıb.

“Biz ABŞ-da kimin prezident seçiləcəyini, yeni administrasiyanı kimlərin təmsil edəcəyini hələ bilmirik. Seçkinin nəticələri məlum olduqdan sonra belə yeni administrasiyanın xarici siyasətlə bağlı öz düşüncələri olacaq", - o, seçkilrədən sonra ABŞ administrasiyasının siyasətindən  danışarkən deyib.

R. Sekuta bildirib ki, hətta nəticələr fərqli olsa belə, qanuna əsasən gələn il yanvarın 20-nə qədər Barak Obamanın rəhbərlik etdiyi administrasiya hakimiyyətdə qalacaq.

O, ABŞ-Azərbaycan münasibətlərinin seçkilərdən sonra necə olacağı ilə bağlı sualın cavabında deyib ki, ABŞ-ın Azərbaycana dair siyasətinin necə dəyişəcəyi haqda danışmaq hələ tezdir, seçkilərin nəticələrini gözləmək lazımdır.-03C-