ABŞ konqresi Rusiyaya qarşı sanksiyalar tətbiq etməyə və onu G8-dən çıxarmağa çağırıb

ABŞ Konqresinin Nümayəndələr Palatası Rusiya qoşunlarının Ukraynanın suverenliyini pozmasını pisləyən qətnamə qəbul edib, Ağ Evi Rusiyaya qarşı sanksiyalar tətbiq etməyə, dünya liderlərini isə ölkəni G8-dən çıxarmağa çağırıb. Bu barədə palatanın beynəlxalq münasibətlər komitəsinin məlumatında deyilir.

Konqresmenlər Rusiyanın Ukrayna ərazisinə hərbi müdaxiləsi faktını tanıyıblar, bu, BMT nizamnaməsinin və Budapeşt Memorandumunun imzalanması zamanı götürülmüş öhdəliklərin pozulmasıdır.

Nümayəndələr Palatasının üzvləri Moskvanı Krım ərazisindən qoşunları çıxarmağa və Ukrayna ərazisində Qara Dəniz donanmasının statusu və yerləşməsi şərtləri haqqına 1997-ci il tarixli müqaviləyə uyğun olaraq yarımadada hərbi iştirakını məhdudlaşdırmağa çağırıb.

Bundan başqa, konqresmenlər Rusiyanı Ukraynanın hər-hansı bölgəsinə müdaxilədən imtina etməyə və “Krımda separatçı və hərbiləşmiş qüvvələrə dəstəyə” son qoymağa çağırıblar. Onların fikrincə, Krım ərazisinə və Ukraynanın digər bölgələrinə dərhal ATƏT nümayəndələri buraxılmalıdır.

Palata Rusiya ilə hərbi əməkdaşlığa dərhal son qoymaq, o cümlədən silah və Ukraynaya təcavüz üçün istifadə edilə biləcək digər hərbi avadanlıqların satışını məhdudlaşdırmaq çağırışı ilə NATO və Avropa İttifaqı üzvlərinə müraciət edib.

Konqresmenlər “digər demokratik dövlətlərin” liderlərini 2014-cü ilin iyununda Soçidə keçirilməsi nəzərdə tutulan G8 sammitini boykot etməyə və Rusiyasız G7 sammiyini başqa ölkədə keçirməyə çağırıblar. Parlamentarilərin fikrincə, “Böyük yeddilik” ölkələri Rusiyanın “demokratik standartlarla bir araya sığmayan” beynəlxalq səhnədə təcavüzkar addımlarını, repressiv xarakterli daxili siyasətini və insan hüquqlarının pozulmasını nəzərə alaraq, ölkənin qrupdan çıxarılması ehtimalına baxmalıdırlar.

Konqresmenlər həmçinin ABŞ prezidenti Barak Obamanın administrasiyasını avropalı müttəfiqləri ilə Rusiya məmurlarına, Rusiya və Ukrayna oliqarxlarına və “Ukraynaya müdaxilənin” həyata keçirilməsində əli olan digər şəxslərə qarşı viza, maliyyə, ticarət və digər sanksiyaların tətbiq edilməsi məsələləri üzrə sıx əməkdaşlığa çağırıblar. Sanksiya obyektləri kimi dövlətə məxsus banklar və ticari təşkilatlar da göstərilib.

Qətnamədə Ukraynanın yeni hakimiyyətinə iqtisadi yardım göstərmək, qaz mənbələrinin diversifikasiyası, o cümlədən ABŞ-dan qaz nəqli vasitəsilə onların Rusiyadan enerji asılılığının azaldılması üzrə səylərini dəstəkləmək təklifi yer alıb. -02D-