ABŞ Putinin qəbul edilməsinə görə Monqolustanı qınayıb

"Çərşənbə axşamı ABŞ Rusiya prezidenti Vladimir Putinin təntənəli qəbul edilməsinə və Beynəlxalq Cinayət Məhkəməsinin orderinə əsasən onun həbs olunmamasına görə Monqolustan hakimiyyətini tənqid edib.

“Biz hesab edirik ki, heç bir ölkə Putinə Ukraynaya qarşı təcavüzkar müharibəsini təşviq etməsi üçün platforma təqdim etməməlidir",- Dövlət Departamentinin nümayəndəsi Metyu Miller brifinq zamanı TURAN-ın sualını cavablandırarkən bildirib.

"Monqolustanın öz öhdəliklərinə sadiq olacağını, suverenlik və ərazi bütövlüyü daxil olmaqla, Birləşmiş Millətlər Təşkilatı Nizamnaməsinin prinsiplərini dəstəkləyəcəyini  gözləyirik",- Miller deyib

Eyni zamanda o, Monqolustanın geosiyasi vəziyyətini etiraf edib. "Biz Monqolustanın vəziyyətini başa düşürük,  iki böyük qonşu arasında sıxışıb qalıb, lakin onun dünyada qanunun aliliyini dəstəkləməsini vacib hesab edirik", - o deyib.

Beynəlxalq Cinayət Məhkəməsinin orderilə Putin Ukraynadan yüzlərlə uşağın qanunsuz deportasiyasında ittiham olunur. Beynəlxalq Cinayət Məhkəməsinin Roma statutunun ratifikasiyasına baxmayaraq, Monqolustan Putinin həbsi barədə orderi yerinə yetirməkdən imtina edib, çünki Ulan-Bator hakimiyyəti Rusiyanın enerji daşıyıcılarından asılı olduqlarını bildirib.