ABŞ Qarabağ məsələsi ilə "dərindən məşğul olmağa davam edir" - Dövlət Departamenti

Vaşinqton/26.04.23/Turan: Çərşənbə axşamı Dövlət Departamenti bu yaxınlarda baş verən uğursuzluğa baxmayaraq, Qarabağ məsələsi ilə "fəal şəkildə məşğul olmağa davam etmək" niyyətini təsdiq edib.

"Baş məsləhətçi Lui Bono, dövlət katibinin köməkçisi Derek Hoqann, dövlət katibi Entoni Blinken bundan sonra da bu məsələ ilə fəal şəkildə məşğul olacaq", deyə Dövlət Departamentinin mətbuat katibinin müavini Vedant Patel gündəlik brifinqdə Turan-ın sualına cavabda bildirib.

"... Bilirsiniz ki, Cənubi Qafqazda bu məsələ dövlət katibi Blinkenin özünün dəyər və böyük əhəmiyyət verdiyi məsələdir", deyə o qeyd edib.

Qafqazda danışıqlar üzrə nümayəndə Bono, habelə dövlət katibinin köməkçisinin müavini Erik Olson keçən həftə, Azərbaycanın Laçın dəhlizində nəzarət-buraxılış məntəqəsi təsis edildiyini elan etməsindən cəmi bir neçə gün əvvəl ayrı-ayrılıqda  regiona səfərlər ediblər.

Patel xatırladıb ki, Dövlət Departamenti bazar günü bu addımla bağlı dərin narahatlığını bildirib. "Düzünü desəm... Nəzarət-buraxılış məntəqəsinin təsis edilməsi sülh prosesinə etimad yaradılması səylərini sarsıdır və biz insanların və məhsulların Laçın dəhlizindən sərbəst hərəkət etməli olduğu fikrini dəstəkləyirik", deyə o bildirib.

Patel Amerikalı diplomatların Bakı və Yerevanda rəsmilərlə söhbətlərinin məzmununa dair şərh verməkdən çəkinib. 0