ABŞ Rusiyaya qarşı xidmətlərə, KİV və müdafiə sənayesinə yönəlmiş yeni sanksiyalar tətbiq edir

Vaşinqton/09.05.22/TURAN: Bazar günü Vaşinqton Rusiyaya qarşı xidmətlər, müdafiə sənayesi və Kremlin təbliğat maşını sahəsində yeni sanksiyalar paketini açıqlayıb.

Bu addım G7 ölkələrinin liderlərinin həmrəylik əlaməti olaraq Ukrayna prezidenti Vladimir Zelenski ilə virtual sammit keçirməsindən sonra atılıb.

Putin "hərbi məqsədinin - Ukraynanı işğal etmək məqsədinin həyata keçirilməsində uğursuzluğa düçar olub, amma o, Rusiyanı qlobal izqoya çevirməyə müvəffəq olub", deyə Ağ Evin məlumatında bildirilir.

Yeni sanksiyalara aşağıdakılar daxildir: 

- Putinin müharibəsini dəstəkləyən Kremlyönlü KİV-lərə zərbə.

- Putinin müharibəsini maliyyələşdirməyə və sanksiyalardan yayınmağa kömək edən xidmətlərin qadağan edilməsi.

- sənaye mühərrikləri, buldozerlər və Rusiyanın müdafiə zavodlarında istifadə oluna biləcək digər predmetlərin ixracının qadağan edilməsi.

- Rusiya və Belarusun daha 2600 vətəndaşı, o cümlədən hərbiçilər Sberbank və Qazprombank rəhbərləri üçün viza məhdudiyyətləri.

Rusiya şirkətləri əvvəlki sanksiyalardan yayınmağa çalışıblar, buna görə yeni sanksiyalar buna yol verilməməsi məqsədinə xidmət edir, deyə ABŞ Administrasiyasının nümayəndəsi jurnalistlərə bildirib.

Ağır mühərrik və buldozer kimi sənaye mallarının ixracına yeni qadağalar müdafiə müəssisələrinə zərbə vuraraq, Rusiyanın hərbi səylərinə təsir etmək məqsədi daşıyır. Belə ki, Rusiyanın iki tank zavodu - "Uralvaqonzavod" və Çelyabinsk traktor zavodu artıq xarici komponentlərin çatışmaması səbəbindən istehsalı dayandırmaq məcburiyyətində qalıb.

KİV-lərə qarşı yeni sanksiyalar Kremlin nəzarəti altında olan üç təbliğat kanalına - Pervıy Kanal, Rossiya-1 və NTV-yə şamil olunacaq. Amerika şirkətlərinin artıq onlara videokamera və ya mikrofon satmasına icazə verilmir, bu kanallarda Amerika reklamı da qadağan ediləcək. Ötən il Amerika şirkətləri Rusiya bazarında 300 milyon dollarlıq reklam alıb.

Fiziki şəxslər üçün 2600 yeni viza məhdudiyyəti işğalda rol oynayan və ya insan hüquqlarının pozulmasında rolu olan hərbi məmurları və Rusiyanın etibarlı şəxslərini əhatə edir.

Məqsədyönlü sanksiyalar Rusiyanın ən böyük maliyyə müəssisəsi olan Sberbankın səkkiz rəhbərinə və avropalıların Rusiyadan təbii qaz almasında rolu ilə əlaqədar indiyədək toxunulmayan Qazprombankın 27 rəhbərinə də şamil ediləcək.

"Rusiyanın Birləşmiş Ştatların dəyərli peşəkar xidmətlərindən istifadə imkanının qarşısının alınması Kremlə təzyiqi gücləndirir və onu sanksiyalardan yayınmaq imkanından məhrum edir", deyə ABŞ maliyyə naziri Canet Yellenin bəyanatında bildirilir.

ABŞ və Qərbin bu ilin əvvəllərində Rusiyanın Ukraynaya hücumundan sonra tətbiq etdikləri çox sayda sanksiya Rusiya iqtisadiyyatını dərin böhrana sürükləyib.

Vladimir Putin İkinci Dünya müharibəsi zamanı faşizmə qalib gəlmək üçün həyatını qurban verən milyonlarla Sovet Rusiyası vətəndaşını "rüsvay edir". 

"Putin Ukraynada törətdiyi vəhşilik haqqında yalan və dezinformasiya yayaraq, bu qurbanları rüsvay edir", deyə Administrasiyanın nümayəndəsi bildirib.

Məmur həmçinin qeyd edib ki, Qazprombank rəhbərlərinə qarşı sanksiyalar avropalıların Rusiya qazını almaq üçün əməkdaşlıq etməli olduğu bankın özünə deyil, bu maliyyə müəssisəsinin rəhbərlərinə qarşı atılan addımlardır.

"Bu, tamamilə bloklama deyil. Biz Qazprombankın aktivlərini dondurmuruq və Qazprombankla hər hansı əməliyyatı qadağan etmirik. Biz Qazprombankın təhlükəsiz sığınacaq olmadığının siqnalını veririk", deyə məmur bildirib.

Məmurun sözlərinə görə, Rusiyaya sənaye məhsulları ixracının məhdudlaşdırılması haqqında qərar Kremlin sənaye potensialını və döyüş imkanlarını sarsıtmağa yönəlib, necə ki, Qərbin mikroçip məhdudiyyətləri Rusiyanın yüksək dəqiqlikli raketlər istehsal etmək imkanını məhdudlaşdırır.

"Yaxın həftələrdə biz Ukraynaya maliyyə defisitini aradan qaldırmaqda və öz əhalisinə əsas xidmətləri göstərməkdə kömək etmək üçün qısamüddətli kollektiv maliyyə dəstəyimizi artıracağıq, həmçinin Ukraynanın uzunmüddətli bərpası üçün variantlar işləyib hazırlayacağıq", deyə Ağ Evin məlumatında bildirilir. -25B-