ABŞ Ukraynaya daha çox hərbi yardım göndərir və deyir ki, İran-Rusiya əlaqələri hamını narahat etməlidir

Vaşinqton/29.10.22/Turan: Cümə günü Bayden administrasiyası Rusiyaya qarşı mübarizədə Kiyevi dəstəkləmək üçün Ukraynaya 275 milyon dollarlıq əlavə hərbi dəstək elan edib. Bu, digər mühüm hərbi sursatlar və HIMARS üçün raketləri əhatə edir.

Pentaqonun siyahısına aşağıdakılar daxildir:

- 500 yüksək dəqiqlikli 155 millimetrlik artilleriya mərmisi,

- 2000 155 155 millimetrlik tank əleyhinə mərmi,

- 1300 tank əleyhinə sistem,

- 125 zirehli maşın,

- 2,75 milyon atıcı silah gülləsi,

- 4 peyk antenası.

ABŞ-ın paketində yeni silahlar olmasa da, əlavə yardım artıq Ukraynada olan kritik silah sistemlərini tamamlamaq üçün nəzərdə tutulub.

"ABŞ-ın Ukraynaya ümumi hərbi yardımı artıq 18,5 milyard dollara çatıb", - dövlət katibi Entoni Blinkenin bəyanatında deyilir.

O deyib ki,  hava hücumundan müdafiə vasitələri yardım paketində əsas istiqamətdir. İlk iki orta mənzilli raket sistemi gələn ay Ukraynaya göndərmək üçün hazırdır.

Vaşinqton həmçinin İran silahlarının Rusiyaya düşməsinin qarşısını almaq üçün “mümkün olan hər şeyi” nəzərdən keçirir.

Turan-ın müxbirinin “İran Rusiyaya pilotsuz təyyarələr göndərməyə davam edirmi?” sualının  cavabında mətbuat katibi Ned Prays bildirib ki, artıq onlarla pilotsuz təyyarə göndərilib və iranlılar Krımdan pilotsuz təyyarələrin buraxılmasına kömək ediblər.

“Dünya bu iki ölkənin eyni məqsəd güddüyünü və onların təkcə Ukraynaya yox, həm də regionda və ondan kənarda digər ölkələrə nə kimi ziyan vura biləcəyini getdikcə daha çox görəcək”, – Prays əlavə edib. 0