Ekspertlər karantin müddətinin uzadılması ilə bağlı rəsmi açıqlamanı tənqid edirlər

Bakı/29.10.22/Turan: Azərbaycanda koronavirus pandemiyası ilə əlaqədar tətbiq edilən xüsusi karantin rejimi 2023-cü il yanvarın 1-dək uzadılıb. Nazirlər Kabinetinin 27 oktyabr tarixli sərəncamı dövlətin ölkədə koronavirus infeksiyasının yayılmasının və onun nəticələrinin qarşısını almaq niyyətilə izah olunur. Davam edən qadağanın nəticəsi dövlətin quru sərhədlərinin bağlanması və nəticədə ucuz quru nəqliyyatı ilə ölkəyə girişin mümkün olmamasıdır.

Bakı Şəhər İcra Hakimiyyəti binasının yaxınlığında quru sərhədlərinin açılması tələbilə etiraz aksiyası keçirən siyasətçi Tofiq Yaqublu Azərbaycanı sivil dünya üçün adi qaydada daxil olmağın mümkün olmadığı Şimali Koreya ilə müqayisə edib.

Sərəncamın qəbul edildiyi vaxtda Azərbaycanda 36 nəfərin COVID-19 infeksiyasına yoluxduğu bildirilib, 49 nəfər sağalıb. Azərbaycanın 10 milyon əhalisi var.

Azərbaycan Milli Elmlər Akademiyası Fiziologiya İnstitutunun baş elmi işçisi, elmlər namizədi Sevinc Hüseynova Turan-ın sualını cavablandırarkən deyib ki, açıqlanan gündəlik xəstəlik göstəriciləri əhali ilə müqayisədə xəstəliyin aşağı faiz olmasından xəbər verir, ona görə də karantinin uzadılmasının səbəbi məlum deyil.

Hüseynova hesab edir ki, statistikada qripə yoluxmuş şəxslər nəzərə alınmır, əslində onlar koronavirusa yoluxa bilər. Ancaq bunu müəyyən etmək üçün onlar covid testləri üzrə yoxlanılmalıdır, ancaq bunu etmirlər.

“Yaxın qohumun ailəsində hamı koronavirus xəstəsi idi. Bir nəfərin test cavabı mənfi, üçünün müsbət çıxdı. Ona görə də Azərbaycanda koronavirusa yoluxma ilə bağlı statistik göstəricilərə inanmıram”, - Hüseynova deyib.

Siyasi analitik Mustafa Hacıbəyli Turan ilə söhbətində karantin müddətinin uzadılması ilə bağlı Nazirlər Kabinetinin növbəti qərarını hakimiyyətə bağlı biznesin iqtisadi maraqları ilə əlaqələndirib.

“Bütün dünyada sərnişin qatarları hərəkət edir, lakin Azərbaycanda dəmir yolu əlaqəsi bağlıdır. Əgər ölkə daxilində hərəkətdə heç bir məhdudiyyət yoxdursa, quru sərhədlərinin bağlanmasını koronavirusun yayılması təhlükəsi ilə izah etmək absurddur.

Qadağanın əsas səbəbi hakimiyyət nümayəndələrinin biznes marağıdır. Hava sərnişin daşımaları tamamilə hakimiyyətin inhisarındadır, əhali və turistlər isə xaricə getmək və ölkəyə qayıtmaq üçün bahalı aviabiletlər almağa məcbur olurlar”.

O, Azərbaycan daxilində dəmir yolu əlaqəsinin dayandırılmasını ölkədə dəmir yollarının rentabelsizliyilə izah edir. "Hakimiyyət Dəmir Yolu İdarəsinə dotasiya vermək istəmir, buna görə də bu nəqliyyat sahəsini bağlayıblar".

Cəmiyyətdə karantinin uzadılması ilə bağlı versiyalardan biri kimi hakimiyyətin Rusiyadan qaçan rusiyalılar üçün sərhədləri açmaq istəməməsi göstərilir. Hacıbəyli Nazirlər Kabinetinin fərmanı ilə Rusiyada hərbi səfərbərlik və rusiyalıların qonşu ölkələrə qaçması arasında əlaqəni təkzib edir.

“Azərbaycanda koronavirusla bağlı karantin sentyabrda Rusiya Federasiyasında səfərbərlik elan edilməzdən xeyli əvvəl tətbiq edilir, ona görə də karantin qadağasının uzadılmasında siyasi anlam axtarmağa gərək yoxdur”, - Mustafa Hacıbəyli fikrini yekunlaşdırıb. -0-