ABŞ Ukraynaya növbəti artilleriya və radar partiyası göndərir

Vaşinqton/07.05.22/Turan: ABŞ prezidenti Co Bayden cümə günü Ukraynaya yeni, doqquzuncu hərbi yardım paketini açıqlayıb.

150 milyon dollar dəyərindəki yeni paketə 25 000 artilleriya mərmisi, artilleriya əleyhinə radarlar və radioelektron mübarizə vasitələri daxildir. Bu qərar Pentaqonun 200-dən çox Ukrayna əsgərinə M777 haubitsalarından istifadə təlimi keçdiyini elan etməsindən sonra qəbul edilib. Daha 150 Ukrayna əsgəri artilleriyanın idarə edilməsi üzrə təlim keçir, bu barədə cümə günü Pentaqonun rəsmi nümayəndəsi Con Kirbi bildirib.

100-dən çox Ukrayna hərbi qulluqçusu Q-64 mobil HHM radiolokasiya sistemi ilə iş və M-113 zirehli avtomobilinin idarə edilməsi üzrə təlim keçib, deyə o bildirib. 

Ağ Evin məlumatına görə, müttəfiqlərinin və tərəfdaşlarının da verdiyi töhfə ilə birlikdə ABŞ-ın dəstəyi Kiyev uğrunda mübarizədə və Putinin Ukraynadakı hərbi məqsədlərinin qarşısının alınmasında həlledici rol oynayıb.

"Fevralın 24-də Rusiyanın hücumu başladıqdan sonra ABŞ-ın Ukraynaya təhlükəsizlik sahəsində silah və avadanlıqdan ibarət ümumi yardımı artıq 3,8 milyard təşkil edib.

Müharibənin bu növbəti fazasında Ukraynanın uğur qazanması üçün beynəlxalq tərəfdaşları, o cümlədən ABŞ Ukraynaya fasiləsiz silah və döyüş sursatı axınını təmin etməkdə birlik və qətiyyət nümayiş etdirməyə davam etməlidir", deyə Bayden bildirib.

Bazar ertəsi, mayın 9-da "Ukraynada demokratiyanın müdafiəsi üçün lend-liz aktı" imzalanacaq, deyə Ağ Evdən bildiriblər.

ABŞ və müttəfiqləri həmçinin bazar günü Almaniya kansleri Şoltsun sədrliyi ilə G7 liderlərinin virtual görüşünü keçirməyə hazırlaşırlar. Ukrayna prezidenti Zelenski də liderlərə qoşulacaq.

"Onlar Rusiyanın Ukraynaya qarşı müharibəsində son vəziyyəti, Putinin müharibəsinin qlobal nəticələrini müzakirə edəcək, Ukraynaya dəstək nümayiş etdirəcək, həmçinin G7-nin birliyini göstərəcək və Putinə qarşı kollektiv sanksiyalarımızdan bəhs edəcəklər", deyə Ağ Ev bildirib. -0-