ABŞ və Aİ Rusiyanın enerji daşıyıcılarından asılılığı azaldacaq

Vaşinqton/26.03.22/Turan: Cümə günü Ağ Ev Putinin Ukraynaya qarşı müharibə apardığı müddətdə ABŞ-ın Avropanın Rusiya qazından asılılığını azaltmaq və Avropanın enerji təhlükəsizliyini gücləndirmək üçün Avropaya təbii maye qaz ixracını artıracağını elan edib, bu barədə Turan-ın Vaşinqton müxbiri xəbər verib.

Belə ki, dünən ABŞ prezidenti Co Bayden və Avropa Komissiyasının sədri Ursula fon der Leyen iki mühüm vəzifəni - 1. Aİ-yə Rusiya qazından asılılığı azaltmağa kömək etmək, 2. Aİ-yə ümumiyyətlə qazdan asılılığı azaltmağa kömək etmək vəzifələrini həll edəcək birgə əməliyyat qrupu yaradıldığını elan ediblər.

"Biz bu plan çərçivəsində bu il əlavə olaraq 15 mlrd. kubmetrə qədər maye qaz tədarük etmək öhdəliyi götürürük", deyə Ağ Evin milli təhlükəsizlik üzrə müşaviri Ceyk Sallivan jurnalistlərə bildirib.

Avropalılar indidən başlayaraq 2030-cü ilə qədər ABŞ-dan ildə 50 milyard kubmetr qaz qəbul etmək üçün öz infrastrukturlarının yaradılması üzərində işləyəcəklər.

"Əsas ideya təmiz və bərpa olunan enerjiyə keçməkdən ibarətdir, hələlik isə qazdan istifadə etmək lazımdır və biz avropalıların Rusiya qazından asılı olmaması üçün əlimizdən gələni edəcəyik", deyə Sallivan bildirib. -25В-