ACP sədri: Azərbaycanda diktaturanın ayaq səsləri eşidilir

Açıq Cəmiyyət Partiyasının (ACP) sədri Sülhəddin Əkbər bazar ertəsi partiya ofisində (Tələt Şıxəliyev küçəsi, 8) polis zorakılığı ilə bağlı mətbuat konfransı keçirib.

S.Əkbər bazar günü, yəni, noyabrın 4-də partiyanın Sumqayıt təşkilatının konfransının keçirilməsi nəzərdə tutulduğunu deyib. Konfrans KXCP Sumqayıt təşkilatının ofisində keçirilməli imiş. Amma polislər ofisin yerləşdiyi binaya gələrək, qaz sızıntısı adı ilə qərargahı bağlayıb, KXCP təşkilat sədrini isə polisə aparıblar. 

S.Əkbər ofisin önünə çatanda burada çoxsaylı polis əməkdaşları və mülki geyimli şəxslərin olduğunu görüb. Polislər partiya sədrinə və yanındakı şəxslərə maşından düşməyə imkan verməyərək, onları kobudluqla 3 saylı polis bölməsinə aparıblar. Öncə izahat almaq istəyiblər, hansısa zənglərdən sonra bundan vaz keçiblər. Polis zabitləri Sumqayıtın “sabit inkişaf etdiyi”ni, hər-hansı konfransa ehtiyac olmadığını söyləyərək, S.Əkbərə Sumqayıta gəlməməyi məsləhət biliblər. 

ACP sədri Bakıya kimi izləndiklərini deyib. “Bu, artıq Azərbaycanda diktaturanın ayaq səsləridir, bu diktaturanı isə dayandırmağa ancaq xalqın gücü çatar”, - deyən ACP sədri demokratik qüvvələrə birlik və xalqı təşkilatlandırmaq çağırışı edib. ACP sədri rejimin özünü qoruması üçün sərt üsullara əl atması ilə əlaqədar bəzi qüvvələrin leqal fəaliyyətdən qeyri-leqal fəaliyyətə keçəcəkləri bəyanatı səsləndirib. Hakimiyyəti belə əməllərilə ölkəni xaos və qarşıdurmalara sürükləməkdə ittiham edib. 

Mətbuat konfrnasında Sumqayıtda baş vermiş hadisəni pisləyən ACP-nin və həmtəsisçilərindən biri ACP olan Demokratik Qüvvələrin Məşvərət Məclisinin bəyanatları yayılıb. 

ACP 2007-ci ildə təsis edilib. Partiyanın lideri Rəsul Quliyev 1996-cı ildən ABŞ-da məcburi mühacirətdədir. S.Əkəbr bu ilin mayından partiyaya sədrlik edir. S.Əkəbərə qədərsə Akif Şahbazov və Vaqif Mahmudov partiya sədrləri olub. 

Demokratik Qüvvələrin Məşvərət Məclisi 2012-ci ilin sentyabrında təsis edilib. Sıralarında 14 partiyanı birləşdirir. -05C-