Aİ ilə Fəaliyyət Planının təqdimatına müstəqil KİV və QHT nümayəndələri dəvət olunmayıb

Mayın 20-də Ədliyyə Nazirliyində Azərbaycanla Avropa Şurası arasında 2014-2016-cı illər üçün birgə Fəaliyyət Planının təqdimatına müstəqil KİV və QHT nümayəndələri dəvət olunmayıb.

Bu, təəccüb doğurur. Çünki planın məzmununun böyük hissəsi demokratik cəmiyyət üçün zəruri olan şəraitin yaxşılaşdırılmasına yönəlib. Bu cür yanaşma planda nəzərə tutulan tədbirlərin yerinə yetirilməsində Azərbaycan hakimiyyətinin səmimi olmasını şübhə altına alır və belə güman etməyə əsas verir ki, hökumətin insan hüquqları sahəsində digər plan və proqramları kimi bu sənəd də deklarativ xarakter daşıyır, yerinə yetirilən iş isə demokratik islahatların imitasiyası olacaq.

Qeyd edək ki, təqdimat mərasimində ədliyyə naziri Fikrət Məmmədov, AŞ baş katibi Torbyörn Yanqland, digər dövlət qurumlarının nümayəndələri, ombudsman, deputatlar, Aİ ölkələrinin səfirləri, hökumətyönlü QHT və KİV təmsilçiləri iştirak ediblər.—06D-