Aİ ilə sadələşdirilmiş viza rejimi ən tez 2014-cü ilin ikinci yarısında tətbiq olunacaq

 Azərbaycan və Aİ arasında sadələşdirilmiş viza rejimi ən tez 2014-cü ilin ikinci yarısında tətbiq olunacaq. Bu barədə Azərbaycan hökumətindəki mənbə Turan-ın müxbiri ilə söhbətində Aİ ilə sadələşdirilmiş viza rejimi haqqında Vilnyusda dünən imzalanmış sazişi şərh edərkən bildirib.

Bu rejimin tətbiq olunması üçün digər müşaiyətedici addımlar atılmalıdır.

Xüsusən, Aİ ilə qeyri-leqal miqrantların qaytarılması üzrə öhdəliklər nəzərdə tutan readmissiya haqqında saziş imzalanması gözlənilir. Bu sazişin gələn ilin birinci rübündə imzalanması nəzərdə tutulur.

Hər iki saziş Avropa Parlamenti və Milli Məclis tərəfindən təsdiq edilməlidir, bundan sonra sinxron şəkildə qüvvəyə minəcək.

Bundan başqa, Azərbaycan Şengen zonasına daxil olan, amma Aİ üzvü olmayan ölkələr – Norveç, İsveçrə, İslandiya və Lixtenşteynlə sadələşdirilmiş rejim haqqında ayrı-ayrı sazişlər imzalamalıdır.

Sadələşdirilmiş rejim Şengen vizalarının alınması üçün təqdim edilən sənədlərin miqdarının azaldılmasını, habelə rüsumun 60 avrodan 35 avroya endiriməsini nəzərdə tutacaq.

Bəzi kateqoriya vətəndaşlar – təhsil, müalicəüçün, qohumlarına baş çəkməyə gedən şəxslər üçün rüsum ümumiyyətlə ləğv ediləcək.

Diplomatik pasport sahibləri vizasız səfərlər həyata keçirə biləcəklər. -06D-