Vilnyus sammitinin iştirakçıları: Azərbaycan Avropaya enerji resurslarının tədarükçüsü kimi strateji rol oynayır

Aİ “Şərq Tərəfdaşlığı” ölkələrinə Cənub qaz dəhlizinin tikintisini davam etdirməyi, Ukraynanın qaz nəqliyyat sistemini müasirləşdirməyi və vahid enerji bazarı formalaşdırmağı vəd edib. Bu barədə “Şərq Tərəfdaşlığı” Avropa Proqramının Vilnyusda başa çatan sammitinin yekun bəyannaməsində deyilir. “Sammit iştirakçıları qaz nəqliyyatı sisteminin inkişaf etdirilməsi və tərəfdaş ölkələrin Avropa enerji bazarına mərhələli inteqrasiyası, habelə enerji resurslarının transsərhəd ticarətinin inkişafı da daxil olmaqla, qarşılıqlı enerji təhlükəsizliyinin yüksəldilməsinə yönəlmiş işi müsbət qiymətləndiriblər”, deyə bəyanatda qeyd edilir.

Cənub dəhlizi layihəsi çərçivəsində sammit iştirakçıları “Cənub Qafqaz və Transadriatik qaz kəmərlərini müasirləşdirmək”, habelə “Aİ-ni Xəzər regionu ilə birləşdirən yeni infrastruktur” yaratmaq niyyətlərini təsdiq ediblər. Sammit iştirakçıları Azərbaycanın Avropaya enerji resurslarının tədarükçüsü kimi strateji rolunu xüsusilə qeyd ediblər.

Sammitin yekun bəyannaməsində Ukrayna ilə bağlı təkcə onun qaz nəqliyyat sisteminin müasirləşdirilməsi deyil, həm də Slovakiya və Xorvatiya, Macarıstan və Ukraynanı birləşdirən “Adriatik qaz dəhlizi” vasitəsilə revers qaz nəqlini inkişaf etdirmək niyyəti qeyd edilir.

Sammitin yekun bəyannaməsinin energetika ilə bağlı hissəsində Belarusun Avropaya enerji resurslarının nəqlini təmin edən tranzit ölkə kimi rolu vurğulanır.

Bundan başqa, sammit iştirakçıları Ukrayna, Ermənistan və Belarusu Avropa atom elektrik stansiyalarının stress-testlərində iştiraka görə alqışlayıblar, xəbəri İtar-Tass yayıb.-12D-