Alman Birliyi Günü münasibətilə  qəbul

Bakı/03.10.22/Turan: Oktyabrın 3-də Almaniyanın Azərbaycandakı səfirliyi bu ölkənin milli bayramı - Alman Birliyi Günü münasibətilə qəbul təşkil edib.

“Bu gün biz Almaniyanın birləşməsinin 32-ci ildönümünü qeyd edirik. Almaniyaya sülh yolu ilə birləşmək və Avropanın azad hissəsi olmaq nəsib olub”, - Almaniyanın Azərbaycandakı səfiri Ralf Horlemann qonaqları salamlayaraq deyib.

O, həmçinin Azərbaycan ilə Almaniya arasında diplomatik münasibətlərin qurulmasının 30-cu ildönümünü qeyd edib.

Bu müddət ərzində iki ölkə arasında müxtəlif sahələrdə əməkdaşlıq dinamik inkişaf edib.

Səfir daha sonra vurğulayıb ki, Almaniya Azərbaycanla əlaqələrin gələcək inkişaf perspektivlərinə nikbin baxır.

Azərbaycan hökuməti adından təbrik məktubunu çatdıran energetika naziri Pərviz Şahbazov ikitərəfli əlaqələrin səviyyəsindən məmnunluğunu ifadə edib.

Onun sözlərinə görə, Azərbaycan prezidenti İlham Əliyev Almaniya ilə əlaqələrə xüsusi diqqət yetirir.

Şahbazovun qeyd etdiyi kimi, Azərbaycan Almaniyanın mühüm iqtisadi tərəfdaşıdır.

Belə лш, bu ilin 8 ayında ölkələr arasında ticarət dövriyyəsi 170 milyon ABŞ dollarına çatıb. Bakı və Berlin enerji sektorunda mühüm tərəfdaşlardır və Aİ həmişə Cənub Qaz Dəhlizinin həyata keçirilməsini dəstəkləyib.

“Bu gün Azərbaycanın işğaldan azad edilmiş ərazilərində bərpa olunan enerji mənbələrinin (BOEM) inkişafı istiqamətində işlər aparılır ki, bu da gələcəkdə onun Avropaya ixracından danışmağa imkan verəcək”, - deyə nazir daha sonra bildirib.-0-