Almaniyada Xocalı faciəsinin 21-ci ildönümü qeyd olunacaq

Bakı/15.02.13/Turan Fevralın 23-də saat 12:00-dan başlayaraq Almaniyanın Frankfurt am Main şəhərinin mərkəzində (Hauptwache adlanan, Zeil küçəsi, Galeria Kaufhof ticarət mərkəzi ilə üzbəüz)  Xocalı faciəsinin 21-ci ildönümü münasibətilə tədbir keçiriləcək. Bu barədə Almaniyada yaşayan jurnalist Sarvan Rizvanov məlumat verib. Onun sözlərinə görə,  anım tədbirini Almaniyanın Mainz və  Frankfurt am Main şəhərlərində yerləşən Azərbaycan təşkilatları birgə keçirəcək. “Burada Xocalı faciəsini özündə əks etdirən stendlər qurulacaq, erməni quldurları tərəfindən dinc yerli əhalinin vəhşıcəsinə öldürmələri haqqında minlərlə xüsusi vərəqələr şəhər sakinlərinə və şəhəri ziyarət edən qonaqlara paylanacaq. Eyni zamanda hadisə baş verən zaman Azərbaycanda yaşamış ictimai fəallar öz təəssüratlarını iştirakçılarla bölüşəcəklər”, - S. Rizvanov bildirib. 

“Almaniyada yaşayan bütün həmvətənlərimizi tədbirə dəvət edirik. Artıq çoxsaylı vətəndaşlar dəvətlərimizə müsbət reaksiyalarını bildiriblər. Bu tədbirin Avropa səviyyəsində ən sanballı anım mərasimə çevrilməsi üçün çoxsaylı insanların iştirakı önəmlidir”, - o  vurgulayıb.